O subdelegado do Goberno en Ourense, Emilio González, puxo de manifesto que a seguridade cidadá será un dos piares fundamentais ao longo deste mes en tódalas vilas da provincia para evitar os posibles incidentes e previr as aglomeracións pero tamén destacou a necesidade da conciencia e responsabilidade colectiva para seguir preservando e garantindo unha das grandes señas de identidade da provincia de Ourense como é o entroido.
Así o manifestou durante a xunta local de seguridade de Viana do Bolo a cal presidiu esta mañá xunto ao alcalde, Andrés Montesinos. O subdelegado anima a tódolos ourensáns a que visiten e participen na ampla programación cultural que se estenderá ao longo do territorio e valorou positivamente o “bo clima” que se deu durante esta primeira fin de semana co “petardazo e fareleiro” do entroido de Xinzo de Limia.
Xunta local de Viana
O subdelegado e o alcalde de Viana do Bolo, Andrés Montesinos, copresidiron a reunión da Xunta Local de Seguridade na que se realizou unha análise da seguridade cidadá, e se estudaron as medidas do Plan de autoprotección do Entroido dada a relevancia e a especial importancia da celebración do Domingo Gordo para a que se prevé a asistencia de milleiros de persoas.
Entroido
No tocante ao Entroido, o Subdelegado solicita que se siga mantendo o mesmo clima de seguridade que se levou a cabo nos últimos anos para que os habitantes de Viana do Bolo poidan desfrutar do verdadeiro espírito do Entroido sen incidentes.
Así mesmo solicitou a máxima colaboración doutras administracións, en especial da Xunta de Galicia, coa policía autonómica; así como a colaboración cidadá para o correcto desenvolvemento destes días de festas dado as grandes aglomeracións que se esperan.
Esta é a última das tres Xuntas de seguridade que o subdelegado presidiu nas semanas previas, cubrindo e analizando as medidas de proteccións que se levarán a cabo nas grandes vilas do Entroido.
