O Concello de Viana do Bolo iniciou os traballos de reforma integral da piscina municipal, unha actuación que busca mellorar de maneira significativa tanto o estado das instalacións como o seu entorno.
Segundo explicou o alcalde, Germán García-Ávila, os traballos consisten na renovación completa do céspede, así como na eliminación de raíces de árbores cortadas con anterioridade, a poda das existentes e a retirada daqueles exemplares que se atopaban en mal estado.
O rexedor destacou o valor destas instalacións, subliñando que «son, sen lugar a dúbida, unha envexa para toda a provincia» e engadiu que «podemos dicir, sen temor a equivocarnos, que contamos cunhas instalacións e un entorno inigualables».
Unha reforma necesaria tras décadas sen intervención
García-Ávila lembrou que desde a súa construción, alá polos anos setenta, non se realizara unha reforma integral deste espazo, o que provocara un deterioro evidente. «Presentaba un estado bastante deficiente, con moitas carencias de céspede e con árbores en mal estado que impedían incluso a entrada de sol», sinalou.
Por iso, considera que esta actuación era imprescindible para garantir o correcto funcionamento e aproveitamento da piscina municipal.
Listo para o verán
O Concello prevé que as obras estean rematadas a mediados do mes de xuño, coincidindo co inicio da tempada estival. «Agardamos que para mediados de xuño estea todo perfectamente acondicionado e que a piscina luzca co aspecto que merece», afirmou o alcalde.
Neste sentido, incidiu tamén na necesidade de coidar este tipo de infraestruturas: «son instalacións moi boas e hai que mantelas e conservalas como corresponde».
Con esta intervención, o Concello de Viana do Bolo busca poñer en valor un dos seus espazos de lecer máis emblemáticos, mellorando tanto a experiencia dos usuarios como a imaxe dunhas instalacións que aspiran a seguir sendo referencia na provincia.
