San Xoán de Río acollerá o 20 de setembro innovación, gastronomía e música

San Xoán de Río prepárase para unha xornada intensa este sábado, 20 de setembro, na que confluirán tres citas que combinan tecnoloxía, tradición e cultura.

O día comezará no Salón de Plenos do Concello coa primeira edición de Rural SocialTech, un encontro pioneiro sobre innovación e economía social. De 10.00 a 20.00 horas, veciños e visitantes poderán percorrer os stands das catro áreas temáticas —Viveiro de Lideresas Dixitais, Factoría de Ideas Xuvenís, Academia de Habilidades Dixitais e Punto de Encontro Interxeracional—, participar en obradoiros de intelixencia artificial, turismo rural ou agricultura sostible, e asistir ás intervencións de expertos que analizarán cuestións como o cooperativismo, o emprendemento feminino, a xestión forestal ou o turismo sostible.
O evento reunirá unha ducia de proxectos innovadores de economía social e pechará coa presentación oficial da súa segunda edición en 2026.

A Festa da Tenreira: sabor e encontro veciñal

A gastronomía terá o seu momento central a partir das 14.00 horas co regreso da Festa da Tenreira, que fora suspendida en agosto a causa dos incendios forestais. O pavillón municipal acollerá un xantar popular no que se servirá un menú con empanada, langostinos cocidos, tenreira asada con patacas, bica, viño, auga, café e licores.

O prezo é de 25 euros por persoa —15 no caso dos menores de 12 anos— e as entradas poden adquirirse ata o día 15 no Concello ou no supermercado Itas.

Concerto de Lucía Pérez: música para pechar a festa

A xornada culminará coa música da cantante Lucía Pérez, que actuará na Praza da Igualdade ás 20.00 horas. O concerto, de acceso libre, converterá o centro da vila nun espazo de celebración e encontro, poñendo o broche final a un día que une innovación, tradición e cultura.