Rubiá celebra o día grande das festas da Ascensión coa misa presidida polo bispo
Tres días hai no ano que relocen máis co sol, Xoves Santo, Corpus Cristi e A Ascensión. Hoxe tocou celebrar este último en Rubiá e realmente brillou o sol e quentou, vaia se quentou!
O día grande das festa da Ascensión en Rubiá celebrouse cunha misa solemne presidida polo bispo de Astorga, Jesús Fernández quen estivo acompañado por outros catro sacerdotes. A homilía que congregou a un cento de persoas estivo cantada polo coro da parroquia. Tras a misa a imaxe da virxe foi portada en procesión dende a igrexa de Santa Mariña á capela da Virxe do Camiño.
Os case que dous quilómetros que separa ás duas igrexas percorréronse nunha hora, entre cantos e loubanzas. Os veciños ían deixando pétalos de rosa ao longo do camiño e os rapaces lanzábanllos a imaxe da virxe. O son da charanga animou tamén o percorrido. O sol de xustiza que ao mediodía caía en Rubiá fixo suar a máis dun.
Ao remate, xa na capela da Virxe do Camiño, a imaxe foi purificada con incenso polo bispo quen agradeceu aos fieis a súa presenza e tamén aos nenos os versos recitados á virxe.
Tres días de festa
Mañá a festa comeza pouco antes da media noite coa actuación de Carta de Ajuste, música dos 80 e 90. O DJ Tariro será o encargado de «pinchar». O sábado a festa estará amenizada pola orquestra Arizona.
O domingo a misa será na honra de San Isidro, haberá procesión e bendición dos campos. E pola tarde a actuación estelar dos Satélites.