Dobre bandeira no Concello do Barco: homenaxe ao CD Barco e apoio ao Celta

A terraza do Concello do Barco loce unha imaxe cargada de simbolismo e deporte: dúas bandeiras colgadas que representan o orgullo local e o sentimento galego. Dun lado, a bandeira do CD Barco, como homenaxe ao club da vila, que vén de proclamarse campión de liga e lograr o ascenso á Terceira RFEF, un fito que enche de alegría á afección e que consolida o bo traballo realizado polo equipo durante toda a tempada.

Xunto a ela, a bandeira do Real Club Celta de Vigo, enviada polo propio club celeste xunto cunha camiseta serigrafiada cos nomes dos 313 concellos galegos e unha carta na que solicita o apoio simbólico de toda Galicia para acadar o obxectivo de volver ás competicións europeas. A bandeira leva o lema «Soño con volver a Europa», como mensaxe de ilusión e unidade arredor do deporte galego.

Desde o Concello do Barco quixeron sumarse a esta iniciativa de apoio ao Celta, ao tempo que celebran o éxito do CD Barco, destacando o bo momento do fútbol galego. «Noraboa @rccelta pola gran tempada que estades a terminar!!! Ogallá logredes entrar en Europa, pero pase o que pase este sábado, foi unha campaña excepcional», publicaron nas redes sociais.

Dobre motivo de orgullo, pois, para o Barco de Valdeorras, que honra aos seus e acompaña aos que soñan en grande.

Aposta polo desenvolvemento sostible e a igualdade

Ademais das bandeiras, na Praza do Concello tamén locen varios bloques informativos do Fondo Europeo de Desenvolvemento Rexional (FEDER), que visibilizan diferentes medidas impulsadas co apoio da Unión Europea.

Estes paneis destacan iniciativas para promover os valores do patrimonio natural e a diversidade, fomentar a participación equilibrada de xénero no mercado laboral, e contribuír a aumentar o emprego e a cohesión territorial nas comunidades costeiras e do interior vinculadas á pesca e á acuicultura. Tamén se sinala o impulso á dixitalización como ferramenta clave para mellorar a vida da cidadanía, favorecer a competitividade das empresas, apoiar a investigación e reforzar a eficacia das administracións públicas.