«Cada un deles é un exemplo para nós». Este é o motivo principal da escolla dos catro membros do xurado do I Premio de Poesía Florencio Delgado Gurriarán, realizada pola organización do mesmo dende o proxecto As Letras de Florencio, que encabeza Débora Álvarez.
Dous deles, valdeorreses. Anxo Baranga, «Irmán Maior do noso proxecto ata este mes de setembro, o noso guía e exemplo nestres primeros pasos; artista, escultor, pintor, home de teatro detrás e diante do público, contista», explica Álvarez. Tamén será membro do xurado «o noso escritor» David Daniel Vázquez, «a persoa que está a crear unha literatura xuvenil grazas á cal o nosos cativos e cativas se achegan á lectura, sen esquecer as súas antoloxías de relatos, as novelas...».
Os outros dous membros, mulleres foráneas, mestras, filólogas. Olga Novo, «unha poeta de carreira dilatada e apaixonada investigadora da literatura, que sabe o que é participar e gañar premios de poesía; o seu segundo libro Nós nus levou o Premio Losada Dieguez», explica a directora do proxecto de Florencio.
O último nome propio do xurado do premio de poesía, María Xosé Silvar, Sés, «unha revolución da música galega, creadora e consumidora incansable de poesía».
