A cooperativa Outonía S. Coop., recente gañadora do primeiro premio ao desenvolvemento rural na categoría de iniciativas promovidas por mulleres convocado por AGADER, lidera o programa de animación á lectura "Bibliotecas Mutantes". A finais de decembro, instalaron catro dispositivos de intercambio de libros nos concellos de Larouco, O Bolo, A Veiga e Porto, promovendo a lectura e a colaboración veciñal no medio rural.
Un modelo de intercambio cultural no rural
Seguen o modelo de bibliotecas libres, ofrecendo un espazo onde calquera persoa pode deixar ou recoller libros. Estas instalacións dependen da veciñanza, que se encarga de encher as casetas con libros que desexan compartir ou intercambiar. A iniciativa busca fomentar a lectura e dinamizar a vida cultural nas comunidades, levando ao rural un modelo que se fixo popular nas cidades, en lugares como cabinas telefónicas ou estacións de metro.
Segundo explicaron as responsables de Outonía, este proxecto é unha aposta por traer innovación e colaboración ás contornas rurais, convertendo os libros nun vínculo de unión entre a veciñanza.
Un proxecto financiado e recoñecido
Esta iniciativa conta co apoio financeiro do "Plan de fomento de la lectura 2021-2024" do Ministerio de Cultura, a través da Dirección General del Libro, del Cómic y de la Lectura. Ademais, o recoñecemento de Outonía por parte de AGADER, cos XV Premios ao Desenvolvemento Rural, destaca a súa contribución ao desenvolvemento social e cultural no rural galego.
