lunes 25/10/21
O Bolo

Os nenos do colexio do Bolo visitaron a granxa escola A Capilla

Quince nenos e tres profesores desfrutaron dunha xornada de lecer e aprendizaxe

Ao redor das dez da mañá, deste martes 10 de novembro, quince rapaces e rapazas do colexio do Bolo acompañados polos mestres emprendían o camiño que os levaría a granxa escola A Capilla, a través de sendeiros. Dous quilómetros a pé para desfrutar da paisaxe e das cores do outono. Para recoller algunha que outra castaña que aínda quedaban nos soutos polos que pasaron ou simplemente para pasar unha mañá de lecer.

Visita ás instalacións da nave de castañas

Antes de chegara á Capilla fixeron un alto nunha nave de distribución de castañas onde lle amosaron como se facía a clasificación. Un tractor meteu as castañas nunha tolva e logo estas pasaron por unha especie de enreixado onde ían caendo segundo o calibre.



Moi pretiño da nave de castañas áchase a granxa escola onde rapaces e mestres deron de comer ás pitas de Mos, recolleron os ovos, abrazaron ó burro e até puideron acariciar ó cordeiro que naceu días atrás.

Ver como os mastíns, Laika e o seu fillo León, guiaban ás ovellas polo prado ou como se ordeñaban foron outras das actividades que realizaron. Houbo tempo para xogos e tamén para comer. Logo do xantar máis xogos e volta para as casas no autobús cos recolleu ás portas da granxa escola.

Concerto da Banda do Bolo

A Capilla tamén é o lugar onde os nenos deste colexio que pertencen a Banda de Gaitas do Bolo fan un concerto a modo de ensaio unha vez o mes. O pasado venres asistimos ás clases que imparte Marco Foxo e até realizamos un vídeo co son dunha peza tocada pola banda entre as ovellas.

A Banda de Gaitas do Bolo ensaiando na Capilla

Vídeo onde se pode ver tocar a Banda de Gaitas do Bolo.

Unha xornada na que nenos e nenas aprenderon un pouco máis do entorno no que viven.

Fotos cedidas


Comentarios
Os nenos do colexio do Bolo visitaron a granxa escola A Capilla