Melisa Macía Domínguez (Vilariño de Conso, 1990) foi elixida presidenta da agrupación local do Partido Popular neste municipio durante o congreso celebrado recentemente. O acto foi clausurado polo presidente provincial do PP, Luis Menor, quen puxo en valor a traxectoria da nova presidenta, destacando que «foi, con só 29 anos, unha das alcaldesas máis novas da provincia e mesmo de España».
Menor subliñou tamén que «as gañas de traballar polo seu concello, xunto coa forza que imprime a mocidade», levaron a Macía a encabezar a candidatura popular nas eleccións municipais de 2019, onde logrou a maioría absoluta, resultado que revalidou no actual mandato.
Coa súa elección, apuntou Menor, «refórzase a súa figura como persoa de referencia do partido no territorio», sinalando que os seus principais cometidos serán «fomentar a participación, garantir a cohesión e involucrar a afiliados e simpatizantes no proxecto popular».
Pola súa banda, Melisa Macía destacou que este congreso supón «un importante paso para organizar o partido», e fixo fincapé na vontade de «escoitar a todo o mundo, sexan ou non do PP, que é a base de todo traballo político». Entre os seus primeiros obxectivos figura fortalecer a implicación da militancia e achegar o proxecto popular á veciñanza do concello.
