Algunha das integrantes da asociación de veciños de San Vicente
Ángela é a encargada de relatar, paso por paso, esta fermosa tradición que tantos anos leva nos pobos. Falamos da "pisa das castañas".
O primeiro que hai que facer é ir a recolecta de castañas. Unha vez que se teñen as necesarias bótanse na caniceira, iso si, tentando non enchela de todo.
¿Que é a caniceira? É un conxunto de listóns de madeira espazados polos que pasa o calor que lles proporciona o lume que hai xusto debaixo. Pouco a pouco, haille que ir dando voltas para que se sequen ben por todas as partes.
¿Como saber se están listas para o seguinte paso? O que se fai é coller unhas poucas, de diferentes sitios da caniceira e, asi, saberase se están ou non o suficientemente secas para proseguir ca tradición.
Agora si, chega o momento de pisa. O que se fai, de maneira tradicional, é metelas todas nun saco e comezar a pisalas ou golpealas para que de esta maneira se desprendan da casca.
Despois, retíranse do saco e procédese a facer a selección con axuda da criba ou bandoxo. Todas aquelas que estean rotas ou en malas condicións serán utilizadas para alimentar aos animais. En cambio, as que si superen esta proba, gardaranse para consumo propio ou, tamén, para a venda.
Vídeo da pisa cedido pola Asociación de Veciños de San Vicente de Leira:
