San Xoán de Río, con apenas 520 habitantes, compartirá protagonismo cos máis de 1,7 millóns de persoas que suman as outras tres rexións europeas implicadas no proxecto Rural EU – Connecting Rural Europe. Durante catro días de traballo intenso, representantes dos catro países participantes —Italia, Croacia, Romanía e España— reuníronse en Palazzo Adriano, en Sicilia, para deseñar conxuntamente unha folla de ruta que inspire as políticas xuvenís nos territorios rurais da Unión.
O encontro, cofinanciado polo programa europeo CERV, estivo coordinado por unha experta da illa de Skye (Escocia) e baséase na participación directa da mocidade, en metodoloxías innovadoras e na colaboración entre realidades moi distintas. A folla de ruta creada será trasladada á Comisión Europea como proposta de referencia.
Un dos fitos máis relevantes será a posta en marcha de proxectos piloto en cada territorio participante, baseados nas conclusións comúns alcanzadas en Sicilia:
• Provincia de Palermo (Italia) – 1,3 millóns de habitantes
• Harghita (Romanía) – 330.000 habitantes
• Vallis Colapis (Croacia) – 85.000 habitantes
• San Xoán de Río (Galicia, España) – 520 habitantes
O alcalde de San Xoán de Río, José Miguel Pérez Blecua, subliña que participar en igualdade con territorios moito maiores «é un exemplo claro do que significa a Europa das persoas, onde o tamaño non importa se hai visión, traballo e compromiso».
A presenza de San Xoán de Río neste proxecto internacional reafirma a súa posición como referente europeo no impulso de políticas de futuro para o rural galego. Cun enfoque aberto, cooperativo e activo, o concello dá un paso máis na súa aposta por un rural vivo, con oportunidades reais para a mocidade.
