No Concello de Quiroga xa ultiman os detalles para poder presentar os presupostos deste ano 2024. De feito, «xa están case rematados, levarémolos o próximo pleno que pode ser en marzo ou a principios de abril», explica o alcalde, José Luis Rivera.
Por outra banda, fora do tema do orzamento, aprobáronse «350.000 € polo Plan Único da Deputación de Lugo. Presentamos todos os proxectos das obras que se ían facer e xa se fixo a tramitación. Estamos pendentes de que se autoricen para empezar cas obras nos distintos pobos».
Recordemos que no Concello de Quiroga hai un total de 120 pobos, entón complícase o labor de facer actuacións en cada un deles. O que pensaron dende o equipo de goberno é que«cada ano tocaralle a unha parte, vámolo dividindo os que teñan máis dificultades ou teñan máis deterioradas as calzadas». O alcalde espera comezar a traballar no mes de abril e «darlle unha volta a Quiroga e as súas aldeas»
Unha das prioridades é «meter unha parte desas obras en aforro enerxético, dentro disto, a máis grande será nalgunha rúa de Quiroga, cada ano vamos cambiar unha». O alcalde estima que «en catro anos a idea é deixar todos os pobos saneados e en bo estado». Deste xeito, espera non ter que estar «reparando todos os anos», conclúe.
