O Instituto de Estudios Valdeorreses (IEV) convoca a segunda edición do seu Concurso de Espantallos, que este ano se desenvolve baixo o lema de «Os gardiáns das hortas». A iniciativa foi presentada este xoves na Casa Grande de Viloira, onde o presidente do IEV, Aurelio Blanco Trincado, destacou o obxectivo de «poñer en valor unha figura fundamental do rural galego, que aínda se pode ver en moitas hortas e explotacións da nosa xeografía, sempre con gran orixinalidade tanto por parte de particulares como profesionais».
Os participantes poderán presentar os seus espantallos —cunha altura de entre 1 e 2 metros— ata o 25 de febreiro de 2026. As tres mellores obras recibirán premios de 500, 300 e 200 euros, respectivamente. Todas as creacións serán expostas nos xardíns da Casa Grande antes de seren colocadas ao longo do Camiño de Inverno ao seu paso por Valdeorras.
Unha iniciativa que tamén aposta pola infancia
Nesta segunda edición, o IEV quere implicar especialmente aos máis pequenos. Así o subliñou Julio Pérez Veiga, membro da Xunta Directiva, quen explicou que se está a presentar o concurso nos colexios e institutos da comarca para fomentar a participación de alumnos e docentes.
Os nenos de entre 5 e 10 anos poderán concorrer cunha versión adaptada dos espantallos: bonecos de entre 30 e 50 cm sen necesidade de soporte. Nesta categoría infantil non haberá premios económicos, pero os tres primeiros recibirán un agasallo e un lote de libros. Se o número de obras o permite, algúns destes espantallos serán expostos en espazos accesibles para a infancia, como centros escolares, parques e xardíns.
Entre as novidades deste ano está a posibilidade de presentar os espantallos por medios telemáticos, unha opción que pretende facilitar a participación. Ademais, o concurso conta con dous carteis diferenciados: un máis visual para o público infantil e outro de estética máis sobria, dirixido a adultos. Ambos foron elaborados por Verónica e Tino, colaboradores do IEV.
A entrega de premios celebrarase nun acto especial con vocación de romaría, onde se agarda contar con gaiteiros e cantareiras para festexar a creatividade e o vínculo co rural.
O certame conta co patrocinio da Axencia de Turismo de Galicia, dentro dun convenio co IEV que busca difundir o patrimonio material e inmaterial de Valdeorras. No marco desta colaboración tamén se desenvolve o XII Concurso Fotográfico Manuel Blanco Pascual, cuxo prazo de participación permanece aberto ata o 24 de outubro e que xa conta con máis dunha ducia de propostas, incluso de participantes estranxeiros.
