Florencio presente na Feira do Viño a través dunha exposición
A mostra multimedia, cedida pola Universidade de Vigo, completa unha axenda moi «florenciana» esta fin de semana na terra que o viu nacer
Viño e cultura danse a man nesta nova edición da Feira do Viño do Consello Regulador da Denominación de Orixe Valdeorras, cun protagonista, Florencio Delgado Gurriarán. É o seu ano e non podía faltar na cita que se celebra este fin de semana do 9 e 10 de xullo en Viloira.
O autor homenaxeado nas Letras Galegas 2022 foi o protagonista da representación que onte, xoves, se celebrou no Teatro Lauro Olmo, cunha viaxe de música, palabra e imaxe a cargo de Arraianos Producións. Tamén o estará no propio recinto feiral onde se instalarán catro paneis multimedia creados pola mesma produtora.
A exposición «A Galicia Infinda de Florencio Delgado Gurriarán» fai un percorrido pola vida e obra do autor e complétase con declaracións da súa familia. Cada panel, ademais de imaxes e texto, conta cun código QR a través do cal se poden ver vídeos breves onde as súas netas, netos, fillas e fillos lembran a Florencio. Segundo o comisario da mostra, Aser Álvarez, trátase «dun material moi valioso porque ves como a memoria de Florencio segue viva na súa estirpe, como se trasladou esa memoria familiar». Entre os audios recollidos, destaca un inédito de Delgado Gurriarán cantando e tocando a percusión.
Os poemas de Florencio estarán presentes na zona de cata da Feira do Viño, onde se instalarán as creacións realizadas por Artesanía Enxebre — unha empresa de Viloira moi implicada na divulgación da obra do poeta corgomés—, que xa se utilizaron nunha cata de poesía e viño da Ruta do Viño de Valdeorras.