O Barco de Valdeorras convértese estes días nun punto de encontro europeo coa chegada de 20 estudantes e catro profesores procedentes de Italia e Romanía, que participan nun programa de intercambio escolar co IES Lauro Olmo.
Trátase de alumnado do Liceo Rosa Gianturco (Potenza, Italia) e do Colegiul Național Pedagogic Mircea Scarlat (Alexandria, Romanía), dous centros cos que o instituto barquense mantén relacións de intercambio educativo. No caso do centro italiano, este é xa o terceiro curso consecutivo no que se desenvolve esta experiencia.
A recepción oficial tivo lugar este luns no Concello do Barco, onde o alcalde, Aurentino Alonso, e a concelleira de Turismo e Promoción Económica, Alba Rodríguez San Martín, deron a benvida ao grupo visitante.
Durante toda a semana, o alumnado participante realizará diferentes actividades pensadas para coñecer O Barco de Valdeorras, a comarca de Valdeorras e as súas costumes, combinando a convivencia co intercambio cultural e educativo.
O programa terá continuidade nas próximas semanas, cando serán estudantes do Barco os que viaxen a Italia e Romanía para completar esta experiencia de intercambio internacional.
