O Concello do Barco de Valdeorras únese á campaña #LuzPorLaEla no Día Mundial da Loita contra a Esclerose Lateral Amiotrófica —ELA— e iluminará de verde a fachada do Concello Vello na tarde-noite de mañá venres día 21.
No último pleno o Concello aprobou por unanimidade a declaración institucional de apoio ao Colectivo de afectados pola ELA. Así comprométese, como forma de colaboración directa da administración local cos afectados por esta enfermidade, a poñer á súa disposición «o asesoramento técnico dos Servizos Sociais municipais á hora de tramitar todas aquelas axudas e/ou prestacións establecidas para a mellora da calidade de vida dos enfermos e as súas familias».
Segundo o propio Concello, comprometeuse —dentro das súas posibilidades técnicas, orzamentarias e loxísticas municipais— a colaborar coa asociación AGAELA «naquelas accións que esta asociación leve a cabo para dar visibilidade e concienciar sobre a realidade desta patoloxía».
21 ourensáns sofren Esclerose Lateral Amiotrófica
A ELA é unha enfermidade neurodexenerativa progresiva que afecta ás células nerviosas responsables de controlar os músculos voluntarios que provoca debilidade muscular, atrofia e dificultades no movemento. Tamén afecta á fala, á deglución e á respiración. Polo de agora non ten cura aínda que nos últimos anos houbo avances significativos no manexo dos síntomas e na mellora da calidade de vida dos pacientes.
21 persoas de Ourense teñen ELA. Destes 21, nove recibiron o diagnóstico durante o 2023, o que supón unha incidencia de 3 casos novos/100.000 persoas por ano. Catro perderon a capacidade de falar e continúan comunicándose grazas ao sistema Irisbond, que a través dun computador, segue os movementos oculares do paciente e os «traduce» o que permite a comunicación dos afectados por ELA.
Todo eles son atendidos na unidade específica creada no Complexo Hospitalario Universitario de Ourense no 2019, á que tamén acoden outros catro ourensáns diagnosticados de esclerose lateral primaria, unha patoloxía con sintomatoloxía similar á ELA, así como outras dúas persoas con enfermidades raras que tamén afectan ás neuronas motoras
O obxectivo desta unidade de ELA é ofrecerlles unha atención completa e personalizada en todo o proceso da enfermidade aos afectados. A unidade está formada por un grupo interdisciplinar do que forman parte o traballador social Javier Gómez Coello, a médica rehabilitadora Martina Fernández Blanco, a psicóloga clínica Yolanda Castro Casanova, a neumóloga Montserrat Díaz Gutiérrez, a endocrinóloga María Teresa Fernández López, e o neurólogo Daniel Apolinar García Estévez.
A terapia multidisciplinar abarca aspectos como a terapia física, asistencia e rehabilitación respiratoria, nutrición especializada, e soporte psicolóxico e social —que busca axilizar o recoñecemento da dependencia para que tarde un máximo dun mes e ofrece acceso aos recursos que hai ao dispor dos pacientes.
