O patio do CEIP Julio Gurriarán volveu converterse este xoves nun enorme espazo de xogos, música e convivencia entre escolares coa celebración da 25ª edición de Cholo e Nela, unha cita xa histórica para a Educación Infantil da comarca que reuniu a preto de 900 persoas entre alumnado, profesorado, familias e colaboradores.
Baixo o lema «Cholo e Nela, construtores de brinquedos», arredor de 450 nenos e nenas de entre 3 e 5 anos procedentes de 14 centros educativos de Valdeorras e comarcas limítrofes participaron nunha intensa xornada de actividades arredor do xogo tradicional, os xoguetes de refugallo e a educación en valores.
O director do centro e membro da organización, Nacho Hermida, explicaba que nesta edición quixeron poñer o foco no valor do xogo como ferramenta de unión e convivencia.
«O centro de interese é o xogo, o xogo popular, os xoguetes de refugallo e tamén un pouco darlle valor ao xogo e ao xoguete como elemento unificador e elemento de paz», sinalaba.
Nun contexto marcado polas guerras e os conflitos internacionais, a mensaxe deste ano xirou precisamente arredor desa idea. «É moi importante tamén concienciar aos nenos de que o xogo e o xoguete axúdannos a estar en paz», apuntaba Hermida, explicando que a canción desta edición leva por título «Cholo e Nela, Brinquedos de Paz».
A convivencia contou coa participación de centros de toda a comarca e tamén dun colexio chegado desde Cubillos del Sil, que leva anos formando parte desta experiencia educativa. «Veñen sempre encantados», destacaba o director.
Ao longo da mañá os pequenos foron pasando por diferentes espazos de rotación con xogos, obradoiros, inchables e exhibicións. Un dos puntos que máis expectación xerou foi a presenza da Garda Civil, Protección Civil, GES e Policía Local, cos seus vehículos e demostracións. «Levamos toda a mañá escoitando sirenas e moito ruído precisamente polo gozo que lles produce esta actividade», comentaba entre risas.
A intensa calor marcou tamén parte da xornada, obrigando a buscar as zonas de sombra do colexio para o xantar. Pola tarde chegou outro dos momentos máis esperados coa actuación en directo de Cholo e Nela e unha selección das cancións máis emblemáticas destes 25 anos de historia.
Hermida aproveitou ademais para agradecer a implicación de institucións, autoridades, profesorado e familias. «Isto non sería posible se non se implicase a xente que participa», aseguraba, destacando especialmente a boa disposición coa que cada ano se vive esta convivencia.
Porque despois dun cuarto de século, Cholo e Nela seguen demostrando que xogar tamén é educar, convivir e construír.
