O Barco volveu xuntarse arredor dunha merenda tan doce como necesaria. A Asociación Española Contra o Cancro (AECC) celebrou no Pavillón Vello a súa primeira chocolatada solidaria, un encontro pensado para dar visibilidade ao traballo da entidade e sumar fondos para a investigación e o apoio ás persoas afectadas polo cancro de mama.
A presidenta da asociación en Valdeorras, Gloria Pérez, explicou que a comarca “sempre colabora, chova ou non chova”, e que esta cita é esencial para continuar coa súa misión: “O diñeiro que se recauda é para a investigación e para os afectados de cancro de mama, tanto psicolóxicamente como socialmente, e mesmo para os familiares”.
Un novo espazo para unha cita que medra
Esta edición trasladouse por primeira vez ao Pavillón Vello, unha decisión motivada pola falta de espazo noutros lugares habituais. “O Concello deixounos o pavillón, é un lugar agradable, ameno e familiar, e creo que aquí imos estar ben”, indicou Gloria.
Ata o de agora, a chocolatada celebrábase no Casino, pero a súa planta principal continúa inutilizable, polo que a organización precisaba unha alternativa máis ampla.
Chocolate, churros e bicas con sabor a colaboración
A merenda non faltou á súa cita: chocolate quente, churros e bicas fixeron as delicias dos asistentes. Pérez destacou as doazóns:
“O chocolate e os churros fixónolos Richar, do bar Lisboa, e as bicas doounas Peima, da Rúa. Ademais, os establecementos do Barco colaboran con pequenos detalles que sortearemos coas entradas”.
A solidariedade tamén chegou doutras formas. Aínda que non contan cunha fila cero oficial, moitas persoas deixaron donativos malia non poder asistir: “Cada un dá o que pode, e xa nos deixaron achegas mesmo nas tendas onde se venden as entradas”.
A presidenta da AECC rematou agradecendo o respaldo de toda a comarca:
“Grazas a todos os que hoxe nos acompañaron, porque sen eles isto non se pode facer. Grazas aos voluntarios e a todos os que colaboraron con este acto.
