Chegou o momento de coñecer os nomes dos gañadores. Tras varias semanas nas que os escaparates dos comercios do Barco se converteron nunha xanela á obra e ao pensamento de Begoña Caamaño, o Centro Comercial Aberto (CCA) puxo o broche final á súa campaña das Letras Galegas coa entrega dos premios aos traballos seleccionados.
A iniciativa, desenvolvida en colaboración cos equipos de Dinamización da Lingua Galega dos centros educativos do Barco, Viloira y Rubiá, volveu sacar a literatura das aulas para levala ás rúas a través dunha proposta que uniu educación, cultura e comercio local arredor da figura da escritora homenaxeada nas Letras Galegas 2026.
Baixo o lema «Tecendo á liberdade», o proxecto convidou o alumnado a reflexionar sobre o legado de Begoña Caamaño e sobre valores presentes na súa obra como a liberdade, a igualdade, a xustiza social ou a solidariedade. Un traballo que tomou forma a través de diferentes actividades, entre elas unha exposición fotográfica distribuída polos establecementos asociados ao CCA.
Os premios recaeron en Noa Montero Casas, do Colexio Divina Pastora; Yaiza Guerreiro Fernández, do IES Lauro Olmo; Sara González Fernández, do IES Martaguisela; Uxía Rodríguez López, do CEIP Plurilingüe Condesa de Fenosa; Aitor Guitián Fernández, do CEIP Virxe do Camiño de Rubiá; Yoel Lopes Real, do CEIP Ramón Otero Pedrayo; e Leo Núñez Macía, do CEIP Julio Gurriarán.
A campaña incluíu tamén unha xincana polos establecementos participantes para animar á veciñanza a coñecer de preto os traballos expostos e percorrer o comercio local. Nesta actividade, a gañadora foi Inés Cela.
Desde a organización destacaron unha vez máis a boa acollida dunha iniciativa que cada ano reforza os vínculos entre os centros educativos e o tecido comercial da vila, ao tempo que contribúe á difusión da lingua e da cultura galegas.
Coa entrega dos premios péchase unha nova edición dun proxecto que volveu converter O Barco nun espazo compartido para a creación, a reflexión e o coñecemento da literatura galega, levando a figura de Begoña Caamaño máis alá das aulas e achegándoa ao conxunto da comunidade.
