A época da vendima xa se atopa ás portas de todos os adegueiros da comarca de Valdeorras. Entre eles atópase Diego Fernández da adega O Cepado. Segundo comunicaban dende a Denominación de Orixe de Valdeorras, a colleita verase atrasada unha semana respecto ao ano pasado.
Con este motivo dende Somos Comarca puxémonos en contacto con Diego para así coñecer de primeira man a situación do viñedo da cooperativa. El mesmo explica que este «é un tema xeral. Será unha semana ou 10 días».
Dende a súa adega atópanse durante estes días realizando mostraxes en diferentes viñedos. Este traballo trátase dunha recollida de maneira manual e aleatoria de vagos polas diferentes viñas. Vendo os resultados, Diego, estima que a colleita comece «sobre a primeira semana de setembro».
Esta campaña viuse afectada por cambios de temperatura bruscos e moita choiva, «tivemos que estar moi atentas aos tratamentos». Superada con éxito esta etapa «prevese unha colleita abundante e de calidade».
Unha das diferencias que reflexa Diego entre o ano anterior e este é a cantidade de mosto que se atopa nas uvas, «este ano penso que estamos nunha mellor situación». Destacar que a colleita media que realizan dende a adega é de «arredor de 30.000 quilogramos».
Os premios aos seus viños
Diego destaca tres recoñecementos importantes que tiveron durante estes oito meses do ano. O máis recente é o recibido nos Premios Vinduero-Vindouro. En concreto foron recoñecidos, con unha medalla de outro cada un, o Cepado Godello 2023 e Cepado Finca A Devesa 2022.
Por outra banda, nos Premios Baco tamén se fixeron co segundo posto, por segundo ano consecutivo, co Cepado Godello 2023. «Isto no é fácil», comenta.
A viña é un traballo de todo o ano
O coidado dunha viña ten que ser «diario». É necesario que todos os días se faga un recoñecemento da parcela. No caso de Diego, o piar é «o meu pai, Manuel, é o que está ao pe do canón sempre. É un seguro de vida, por así dicilo, é o que está ao 100%».
Os próximos proxectos da adega O Cepado
De cara ao 2025 dende a adega o Cepado poderán avanzar máis sobre novos proxectos. De momento, «hai cousas que están en estudo». Unha das características desta cooperativa é que «nos gusta probar novas cousas, iso si, coa variedade de godello».
A pesar de estas probas, queren seguir apostando polas referencias que xa teñen no seu catálogo «sen deixar de lado a calidade e o nivel». Así mesmo, se teñen unha oportunidade de innovar e que «sexa agradable para a xente» vano intentar.
Como xa se ten dito en moitas ocasións, «o godello é a variedade reina de Valdeorras. Sabémolo aquí e en todo o mundo». Pero Diego non se quere esquecer das apostas tintas. «Os viños tintos galegos e de Valdeorras están a ter un incremento de consumo». Asegurando así que os consumidores buscan «viños frescos e Valdeorras tenos».
