domingo. 31.08.2025

O San Vitoiro de Lardeira unha festa de altura: Lardeira honra a San Vitoiro con tradición e festa a 1200 metros de altitude

Centos de veciños e visitantes participaron na misa, procesión e xantar malia o tempo desapacible, reafirmando o compromiso coa tradición e coa devoción popular
somoscomarca_20250831_lardeira_sanvitoiro_capilla (2)
Lardeira honra a San Vitoiro con tradición e festa a 1200 metros de altitude

A 1.200 metros de altitude, nas estribacións de Pena Trevinca, érguese a capela de San Vitoiro, un lugar que cada ano se enche de vida e devoción. A súa altura non só marca o territorio, senón tamén a fe dos romeiros que soben até aquí para escoitar misa, acompañar a procesión e compartir xuntos o xantar nas inmediacións da ermida.

Aínda que o ceo amencía cuberto e o vento facía presenza desde primeira hora da mañá, nada impediu que a pequena aldea de Lardeira, situada no concello de Carballeda de Valdeorras, celebrase este domingo, 31 de agosto, a súa tradicional romaría na honra de San Vitoiro. Como cada ano, a cita congregou a veciños da contorna e a devotos chegados de puntos máis afastados, decididos a manter viva unha das celebracións máis emblemáticas da zona.

somoscomarca_20250831_lardeira_sanvitoiro_capilla (5)

A xornada festiva deu comezo ás 13.00 horas, coa procesión ao redor da capela que leva o nome do santo, situada a un quilómetro e medio do pobo por unha pista de terra. Aínda que o camiño non é doado, especialmente en días pouco amables como o deste domingo, os fieis acudiron puntuais. A procesión, co santo á fronte, rodeou a capela recuberta de pizarra, ao tempo que os asistentes entoaban cánticos relixiosos e ofrecían oracións.

 

A continuación celebrouse a misa, presidida polo párroco Juan José Prieto, nun ambiente de recollida espiritual pero tamén de ledicia compartida. E é que esta romaría, ademais da súa dimensión relixiosa, é unha cita clave para o encontro social e o reencontro entre veciños e familiares.

somoscomarca_20250831_lardeira_sanvitoiro_capilla_panoramica

Unha das particularidades que fan desta festa algo especial é o seu emblemático emprazamento, a nada menos que 1200 metros de altitude, nunha chaira que ofrece unhas vistas privilexiadas e unha atmosfera única. Este ano, por mor das condicións meteorolóxicas, a tradicional comida ao aire libre na pradeira foi trasladada a unha carpa instalada preto da capela, onde os asistentes puideron seguir gozando do xantar, no que non faltou o polbo.

somoscomarca_20250831_lardeira_sanvitoiro_capilla (4)
A pulpeira e o pulpo non faltan nnesta romaría

Algunhas familias mantiveron tamén a súa propia tradición. É o caso da familia Docampo, que desde hai máis de corenta anos abre unha caseta que só se utiliza para o día do San Vitoiro. Espazos como este simbolizan o vencello emocional que moitas persoas gardan con esta festa.

somoscomarca_20250831_lardeira_sanvitoiro_capilla (3)
Familia Docampo na festa do san Vitoiro de Lardeira

A música non podía faltar, e xa comezou coa música na sesión vermú que continúa pola tarde, nas que se mesturaron os ritmos actuais coas pezas máis tradicionais, facendo bailar a todos os presentes.

Veciños de O Trigal, Casaio, Viladequinta, así como persoas chegadas desde San Pedro de Trones ou mesmo desde La Baña, non quixeron perder esta cita anual que, pese ao paso do tempo, segue a xuntar devoción, música, gastronomía e confraternidade nun enclave natural de enorme beleza.

O San Vitoiro de Lardeira unha festa de altura: Lardeira honra a San Vitoiro con...