A Xunta de Galicia recibiu dúas ofertas para a execución das obras de mellora dos espazos públicos nos núcleos de Meda e Lamalonga, no concello ourensán da Veiga. A intervención, licitada por un importe de 150.000 euros, está incluída no Plan Hurbe.
Grazas a esta actuación, habilitaranse un parque infantil e unha zona de estancia para os veciños e veciñas en cada un destes lugares. O prazo estimado para a execución das obras é de catro meses.
Segundo o convenio asinado entre a Xunta e o Concello da Veiga, a Administración autonómica financiará o 70 % do investimento, mentres que o 30 % restante será achegado polo propio Concello.
Esta intervención inscríbese no marco do Plan Hurbe, co que a Xunta colabora cos concellos galegos para levar a cabo actuacións singulares orientadas á recuperación de espazos públicos ou á mellora de equipamentos comunitarios.
«Este tipo de proxectos permiten dotar aos núcleos rurais de infraestruturas que melloran a calidade de vida e fomentan a cohesión territorial», salientan desde a Consellería de Vivenda e Planificación de Infraestruturas.
A través do Plan Hurbe, a Xunta continúa promovendo a colaboración coas entidades locais na execución de obras que contribúan á revitalización do territorio, melloren a accesibilidade e eliminen barreiras arquitectónicas, apostando polo equilibrio territorial e a calidade dos espazos urbanos.
