A conselleira de Economía e Industria, María Jesús Lorenzana, mantivo esta semana un encontro de traballo co alcalde da Veiga, Juan Anta, no que abordaron as necesidades de solo empresarial do municipio co obxectivo de reforzar o seu desenvolvemento industrial. Esta reunión enmárcase dentro da rolda de encontros que a titular de Economía e Industria está a manter cos alcaldes e alcaldesas da Comunidade galega para analizar as oportunidades de crecemento económico nos distintos territorios.
Durante a xuntanza, Lorenzana e Anta analizaron a dispoñibilidade e as necesidades de solo industrial da Veiga, así como o papel estratéxico da madeira no desenvolvemento dos espazos rurais e urbanos. O concello ourensán conta cunha destacada masa forestal de piñeiro e carballo, o que ofrece oportunidades para potenciar o sector madeireiro-forestal como motor de crecemento.
A conselleira destacou o compromiso da Xunta de Galicia con este sector estratéxico a través de axudas para impulsar o uso da madeira na construción, que no 2024 alcanzaron os tres millóns de euros. Ademais, lembrou que o obxectivo do Goberno galego é que progresivamente o 20 % das edificacións da Administración pública empreguen madeira nas súa estruturas.
Finalmente, Lorenzana subliñou que estas actuacións forman parte dunha política industrial máis ampla, orientada a impulsar sectores estratéxicos, integrar novas cadeas de valor, fomentar a formación e a atracción de talento, así como mellorar a competitividade da industria galega.
Entrega da Deputación dos traxes das figuras de Entroido da Veiga
O deputado de Representación Institucional, Rosendo Fernández, asistiu á entrega dos traxes do Entroido da Veiga —O Cacharrelo e O Boi—, no Museo Galego do Entroido (Xinzo de Limia).
Ao acto, ademais do alcalde da Veiga, Juan Anta, asistiron unha nutrida representación do folión da Veiga así como veciños.
