A terceira edición das xornadas “Astrotrevinca” achegarán a astronomía a todo o público interesado na observación do ceo, do día 2 ao 4 de setembro no Concello de A Veiga. A presentación desta iniciativa tivo lugar esta mañá no Pazo Provincial da Deputación de Ourense, acto no que participou o vicepresidente da Deputación de Ourense, Rosendo Fernández; o alcalde do Concello de A Veiga, Juan Anta; e o director de “Astrotrevinca”, Óscar Blanco.
Rosendo Fernández lembrou que o Concello de A Veiga é “un dos catorce destinos turísticos “Starlight” no mundo que conta con esta certificación e que converte a Trevinca nun dos mellores lugares do mundo para contemplar as estrelas”. Asemade o vicepresidente da Deputación de Ourense dixo que se trata “dun evento no que se dan cita investigadores e público en xeral para debater sobre a observación das estrelas e sobre as últimas noticias en aplicacións e en programas astronómicos”, e engadiu, “estas iniciativas fomentan un segmento do turismo emerxente na provincia de Ourense, o astroturismo, no que a Deputación de Ourense colabora de forma decidida.”
O director de “Astrotrevinca” explicou que con estas xornadas “pretendemos levar a astronomía a todo o público en xeral, ao público que ten curiosidade por aprender cousas sobre a observación do ceo, por iso, realizaremos dúas xornadas de observación nocturna que é o principal, pero acompañadas durante o día de conferencias e talleres”.
A programación prevista para eses días comeza o venres 2 de setembro coa observación astronómica no Mirador Estelar das Tabillas. Ao día seguinte, e trala presentación das xornadas, terá lugar ás 11.00 horas a primeira conferencia, “Bajo la sombra de la luna”. A segunda conferencia dedicarase á fotografía nocturna e ao enfoque nocturno. A xornada de mamá rematará cunha observación solar con telescopio especial (H alpha). As actividades retomaranse a partir das 16.00 horas, coas conferencias: “Tierraformación”, “Bajo los cielos de Namibia”, e “Starmus 2016, cinco días con las estrellas”. Ás 19.15 horas, terá lugar a clausura das xornadas. Por último, ás 22.00 horas será a quenda de novo para a observación astronómica no Mirador Estelar das Tabillas. O domingo, 4 de setembro, realizarase unha ruta pola “Cántara da Moura”.
Óscar Blanco destacou que o Concello de A Veiga é “un sitio para ver o ceo en condicións excelentes porque cumpre os requisitos que buscamos: pouca contaminación lumínica, bo tempo, noites despexadas e unha paisaxe estupenda”.
Pola súa parte, Juan Anta asegurou: “Seguimos apostando por un astroturismo que está funcionando ben, de feito, estas xornadas, antes de comezar a anuncialas, xa temos moitos das nosas casas rurais reservadas para eses días, polo que seguiremos apostando por el. Imos a homologar cinco rutas que van a Trevinca e imos a facer tres miradoiros nos vindeiros meses. Todo elo para facer que o astroturismo en A Veiga sexa o referente desta tendencia turística en Galicia e no norte de España”.
Os interesados en participar poderán inscribirse na Oficina de Turismo de A Veiga a través do número de teléfono 988.350.130, ou do correo [email protected]. O prezo da inscrición é de 10 euros, ou con comida de 25 euros.
