O Concello da Rúa invita á súa veciñanza a participar no II Concurso de Decoración Natalicia, unha iniciativa que busca dinamizar a cidadanía e infundir un ambiente festivo na localidade. Este concurso, dirixido a persoas, colectivos, comercios e comunidades, ten como obxectivo fomentar a creatividade, os valores comunitarios e o uso de materiais reciclados para crear un entorno acolledor e ilusionante durante o Nadal.
Categorías para todos os públicos
O concurso divídese en catro categorías, que permiten a participación de diferentes colectivos:
- Comercios e hostalaría (Categoría A)
- Xanelas e balcóns (Categoría B)
- Casas particulares (Categoría C)
- Premio especial (Categoría D): Dirixido a comunidades de veciños, colexios, Rúa ou praza
Inscricións e calendario
As persoas interesadas poderán inscribirse a través dun formulario en liña ou de forma presencial na Casa do Concello dende o mércores 4 de decembro ata o venres 20 de decembro de 2024.
Os elementos decorativos deberán permanecer expostos dende o 20 de decembro ata o 6 de xaneiro de 2025. Posteriormente, o xurado dará a coñecer o fallo o 9 de xaneiro, publicando os resultados nas plataformas oficiais do Concello e contactando directamente cos gañadores.
