O Nadal en A Rúa vive este ano un momento especial na igrexa de Santo Estevo, onde o tradicional Belén volve converterse nun dos grandes atractivos destas datas, ao tempo que se recupera un feito histórico, Santo Estevo sairá de novo en procesión polas rúas da vila, setenta anos despois da última vez que o fixo.
O Belén de San Estevo é unha impresionante representación do nacemento de Xesús que destaca tanto pola súa antigüidade como polo coidado artesanal co que foi elaborado. As súas figuras, de gran tamaño, datan do ano 1952 e conservan intacta a súa capacidade para sorprender a quen se achega a visitalo. Detrás desta obra colectiva están Manolo, Elena, Pili, Paqui, Toña, Carmen e Carlos, veciños que cada ano dedican tempo e ilusión a manter viva esta tradición.
Un dos sinais de identidade deste Belén é que está realizado de forma cen por cen natural. Musgo, cepas, serrín, madeira, pedras e cortiza conforman unha escenografía na que non hai lugar para elementos artificiais. «Aquí todo vén da natureza», explica Manuel Martínez. Ademais, o xogo cos tamaños das figuras —máis pequenas ao fondo— permite crear unha sensación de profundidade e infinito, dotando á escena dunha grande riqueza visual.
Os camiños que conducen ao Portal representan rutas de Oriente, monte e pobo, simbolizando a diversidade de procedencias e a unión de persoas e culturas arredor dun mesmo punto. Unha mensaxe que cobra aínda máis forza neste Nadal tan significativo para a parroquia.
Entre as pezas máis chamativas destacan a fiandeira ou a figura dun home guiando un asno, escenas que espertan a curiosidade e o sorriso do público. Especial protagonismo ten tamén o estanque con peixes vivos, onde os máis pequenos pasan longos momentos tentando descubrilos baixo a auga.
Este ano, o Belén comparte protagonismo cun acontecemento histórico, a recuperación da procesión de Santo Estevo, que non se celebraba desde hai máis de 70 anos. Un xesto cargado de simbolismo que reforza o vínculo entre a parroquia, a súa historia e a súa xente.
Así, entre tradición, memoria e ilusión renovada, A Rúa vive un Nadal que mira ao pasado para seguir avanzando, demostrando que as raíces, cando se coidan, seguen dando vida xeración tras xeración.
