A mocidade galega menor de 36 anos xa pode solicitar desde este venres 13 de febreiro o Bono Emancípate, unha liña de axudas dotada este ano con 3 millóns de euros e destinada a facilitar os primeiros gastos asociados á posta en marcha dun fogar. O prazo permanecerá aberto ata o 30 de abril ás 20.00 horas, salvo que se esgote antes o crédito dispoñible.
A iniciativa, impulsada pola Consellería de Cultura, Lingua e Xuventude, incrementa o seu orzamento nun millón de euros respecto á convocatoria anterior e busca apoiar economicamente ás persoas novas que dean o paso de independizarse, xa sexa mediante un contrato de alugueiro ou a adquisición dunha vivenda en propiedade.
Poderán optar á axuda as persoas menores de 36 anos que conten cun contrato de alugueiro ou cunha escritura pública de compravenda formalizados con posterioridade ao 30 de abril de 2025. No caso do alugueiro, o contrato deberá ter unha duración mínima dun ano.
Entre os requisitos tamén figura non ter recibido esta axuda na convocatoria de 2025, dispoñer de polo menos unha fonte regular de ingresos e que a suma dos ingresos anuais da unidade de convivencia non supere catro veces o IPREM (ou tres veces no caso de persoas sen unidade de convivencia).
As persoas solicitantes deberán ter nacionalidade española ou dalgún Estado da Unión Europea ou do Espazo Económico Europeo e estar empadroadas na vivenda na que vaian residir.
Contías e gastos subvencionables
As contías varían en función da situación da persoa beneficiaria: 1.500 euros para quen viva de alugueiro e 3.000 euros para quen adquira unha vivenda en propiedade.
O importe deberá destinarse á adquisición de mobiliario e outros artigos necesarios para o fogar, como elementos decorativos, obxectos de baño, enxoval de cociña, téxtil ou determinados electrodomésticos esenciais.
Unha vez concedida a axuda, esta farase efectiva a través dunha tarxeta moedeiro virtual expedida a nome da persoa beneficiaria. A tarxeta deberá empregarse antes do 31 de decembro de 2026 en comercios físicos de Galicia, non estando permitido o seu uso para compras a distancia.
Na primeira convocatoria, celebrada en 2025, rexistráronse 3.718 solicitudes. Tras unha ampliación de crédito de 250.000 euros que se sumaron aos 2 millóns iniciais, a axuda chegou finalmente a 1.066 persoas: 584 que se emanciparon en réxime de alugueiro e 482 en propiedade.
Co incremento orzamentario desta segunda edición, a Xunta estima que podería alcanzarse a arredor de 1.400 persoas beneficiarias, dependendo do número de solicitudes presentadas en cada modalidade.
A convocatoria tramítase exclusivamente de maneira telemática a través do formulario normalizado dispoñible na sede electrónica da Xunta de Galicia.
