Xornada festiva no Barco que hoxe honra a súa patroa Santa Rita, avogada dos imposibles
Un ano máis fixo bo tempo o 22 de maio para que o San Bieito de que en Santa Rita sempre chove se desterre dunha vez. Aínda que queda moito día por diante e haberá que agardar a ver o que pasa.
Unha salva de bombas de palenque anunciaba a festividade a primeira hora da mañá espertando aos barquenses que, de seguro, onte a noite andiveron de troula polo Malecón. E, desde as 11:00 ás 12:00 ,que saíu a procesión, non pararon de soar.
A Banda de Música do Barco fixo o pasarrúas vespertino pola vila. A derradeira en ouvir as acompasadas notas da banda foi a rúa Conde de Fenosa, desde onde os músicos se achegaron até a igrexa de Santa Rita para acompañar co seu son, a imaxe da santa durante todo o percorrido.
As rosas collidas nas mans encheron de cor cada recanto da procesión. Xentes de toda a comarca achegáronse a vila para facerlle compañía á santa e bendecir as rosas, que segundo di a tradición non se poñen mustias se as toca. Tempo para saudar a vellos coñecidos e a outros que no o son tanto. Agradeceuse a presenza de Julio Mourelo —o pasado ano non asistiu por unha indisposición— para colocarnos aos nenos diante de imaxe de Santa Rita e que as fotos saísen aínda máis bonitas. Tamén a deferencia e comprensión dos asistentes para os fotógrafos, facilitando todo o tempo a súa labor.
Despois de recorrer a calle España, Marcelino Suárez, Pérez Lista, Santa Rita, Eloi Rodríguez Barrios e Balorca; a santa volveu de novo a súa igrexa, por certo, abarrotada de xente. O coro Santa Rita dirixido por Silvina Bravo cantou durante toda a homilía.
Logo tempo para tomar o vermú cos amigos e dirixirse até a praza de Andrés de Prada onde a Banda de Música do Barco dirixida por Manuel Prada deu un concerto.
Vídeo da chegada da santa á igrexa pola rúa Balorca.