No corazón de Bembibre (Viana do Bolo), entre panais de mel e recordos dun pasado cheo de traballo artesanal, atopamos a Benigno Basteiro. Apicultor de profesión e coleccionista por paixón, este veciño leva toda unha vida recopilando obxectos que contan historias dun tempo onde a vida se escribía coas mans e ferramentas.
«Teño unha colección de navallas e reloxos despertadores bastante importante», explica con orgullo. Pero non só son navallas e reloxos o que enche o seu particular mundo, senón tamén auténticas pezas de museo e aperos de labranza. «Desde pequeno vivín nestas casas antigas e nunca tiraba nada porque me gustaba», confesa, revelando a semente da súa paixón.
Un dos seus tesouros máis queridos é unha malladora antiga de gasolina, un aparello que marcou a transición entre o mallar a man e os primeiros avances mecánicos. «Restaureina e agora estou tentando poñela en funcionamento», di con entusiasmo. Cada peza que conserva está impregnada de recordos persoais. As ferramentas do seu tío ebanista, ou as vivencias de traballo coas vacas durante a súa infancia, son só algúns dos exemplos que reflicten o amor de Benigno pola historia e o pasado.
A súa colección vai máis aló do mundo agrícola. Benigno tamén reúne instrumentos de oficios case esquecidos: «O de zapateiro, que está case perdido, ou o de hojalatero. Antes polas aldeas viña un home que facía potas ou regadeiras. Eu aínda recordo algo diso, pero os nenos de hoxe xa non saben nada destas cousas», lamenta con certa nostalxia.
Outra das seccións especiais no seu museo particular é a súa paixón polas navallas, que comezou durante as súas viaxes por Francia. «Alí cada zona presumía dos seus museos. Empecei a ver navallas antigas, e algúns dicíanme que estaba louco por compralas coas follas oxidadas», recorda entre risos. Aínda que iso non lle impediu ter máis de 2000.
Pero aquí non se frea a curiosidade de Benigno. «Mentres poida, vou seguir visitando museos e mercadillos», asegura. Ademais, co apoio de amigos anticuarios, segue atopando xoias únicas. «Moitos xa son como familia. Se entra unha peza que me pode encaixar, pásanme unha foto e xa decido se reservala ou non», explica.
A pesar de levar toda unha vida coleccionando, a súa ilusión segue intacta. «Hoxe hai poucas pezas nos rastros que eu non saiba identificar, pero se aparece algo descoñecido, saco unha foto e mándoa a algún anticuario. Nunca deixo de aprender», di cun sorriso que reflicte a súa paixón incombustible.
Benigno Basteiro non é só un apicultor; é un auténtico gardián do tempo e contador de historias. A través dos seus obxectos, mantén viva a memoria dos oficios e tradicións que deron forma á nosa terra. E mentres siga coleccionando, seguirá tecendo pontes entre o pasado e o presente, asegurándose de que estas xoias da historia nunca caian no esquecemento.
