San Xoán de Río homenaxea a José Luis Vázquez Sotelo ante máis de 600 persoas

San Xoán de Río celebrou este venres 14 de agosto unha nova edición da Festa do Emigrante, unha cita que volveu poñer no centro a todas aquelas persoas que tiveron que desenvolver boa parte da súa vida persoal e profesional lonxe do municipio, pero que nunca perderon o vínculo nin o orgullo polas súas raíces.

O acto reuniu a máis de 600 persoas, unha importante resposta de público para unha homenaxe que este ano tivo como protagonista a José Luis Vázquez Sotelo, nacido en San Xoán de Río en 1935 e cunha destacada traxectoria profesional no ámbito do Dereito.

Xurista, avogado e catedrático de Dereito Procesual, Vázquez Sotelo foi tamén maxistrado do Tribunal Superior de Corts de Andorra. A homenaxe, celebrada no marco desta segunda edición da Festa do Emigrante, quixo recoñecer non só a súa carreira profesional, senón tamén ese vínculo coa terra de orixe que está precisamente na esencia desta iniciativa impulsada polo Concello de San Xoán de Río.

A celebración converteuse así nun encontro entre veciños, familiares, amigos e persoas chegadas de diferentes lugares nunhas datas especialmente significativas para os municipios do rural, cando moitos dos que viven fóra regresan ás súas casas e aldeas para pasar o mes de agosto.

Unha Festa do Emigrante que, na súa segunda edición, continúa reivindicando a memoria de quen marchou de San Xoán de Río para construír a súa vida lonxe, pero seguiu levando o nome e as raíces do municipio alí onde foi.