jueves. 30.03.2023

O Entroido volta a Trives o 12 de febreiro cun desfile de folións e coa orquestra París de Noia

A Asociación Os Labregos organiza esta xuntanza que comezará ás 15:00 horas dende a Finca da Barreira

O Entroido volta a Trives o 12 de febreiro cun desfile de folións e coa orquestra París de Noia

Trives quenta motores para un Entroido que comezará o vindeiro 12 de febreiro a partires das 15:00 horas. A Asociación Os Labregos organiza un desfile no que participarán 13 agrupacións que percorrerán a vila, dando comezo dende a Finca da Barreira. Ademais, o día culminará coa actuación da orquestra París de Noia.

Javier Rodríguez, presidente da asociación, explica que este ano teñen máis ganas que nunca, posto que no pasado 2022 o Entroido estivo marcado polas restricións da Covid-19. “O día doce vai ser un dos días máis fortes do Entroido, tanto de Trives como da provincia de Ourense”, afirma.

Os Labregos abrirán o desfile como anfitrións, e despois seguiranos os folións As Maceiras, A Lardeira e A Caniceira (de Trives), Os Arrierios de Petín, Os Viticultores de Vilamartín; os folións da Veiga, Manzaneda, Chandrexa de Queixa, Fradelos, Buxán, Carracedo da Serra; e a Asociación Xuntos polo Folión de Vilariño de Conso. Unha vez rematado o percorrido terá lugar unha xuntanza con merenda para os folións. “Estamos moi contentos coa colaboración do Concello”, recoñece Rodríguez.

Os Labregos non só tocarán o día 12, senón que como explica o seu presidente, “comezaremos esta fin de semana e non pararemos ate o 25 de febreiro, case un mes de actividade”. Esta asociación conta con 86 membros de todas as idades. “É moi emotivo porque aprendes tanto das ganas dos pequenos, como do sentimento dos máis maiores, da forma que o seguen a vivir aínda que xa non camiñen ben ou teñan dificultades”, recoñece Javier Rodríguez.

E é que o Entroido é un sentimento “que só o coñece a xente que toca un bombo ou que se enfunda un traxe de boteiro”. Para o presidente de Os Labregos de Trives é “algo que non ten explicación, soamente a que sintas propia”.

Xuntanza de Folións na Pobra de Trives, Entroido 2022 (31)
Xuntanza de Folións na Pobra de Trives, Entroido 2022 

O Entroido volta a Trives o 12 de febreiro cun desfile de folións e coa orquestra París...