Rubiá énchese de ambiente co arranque do seu Mercadiño de Nadal

O Mercadiño de Nadal de Rubiá volveu marcar o inicio oficial das festas  cunha nova edición que encheu de ambiente as rúas e o espazo dedicado aos expositores. O evento, promovido polo Concello de Rubiá, abriu as súas portas o sábado 29 de novembro ás 16.00 horas, reunindo 24 postos de produtores, artesáns, comercio local e entidades sociais.

Como en anos anteriores, a variedade foi unha das grandes protagonistas. O público puido atopar mel, licores, queixos, doces, cosmética natural, artesanía en madeira, cestería, decoración de Nadal e libros, ademais dos produtos de establecementos locais como Librería Teresita ou Trastos. Tamén participou a asociación Asfaval, que un ano máis achegou o seu traballo ao público visitante.

A tarde desenvolveuse cun ir e vir continuo de xente, atraída pola ampla oferta e polo ambiente propio destas datas. Moitas persoas aproveitaron para mercar pequenos detalles e agasallos pensando no Nadal, apoiando o comercio local e os produtores da zona.

O mercadiño pechou ás 20.00 horas, pero antes de rematar a xornada, todos os asistentes puideron desfrutar dun magosto popular, que volveu reunir á veciñanza arredor das castañas asadas.

A programación continúa hoxe, domingo 30 de novembro, cun horario dividido en dúas quendas:

• De 12.00 h a 14.00 h pola mañá

• De 16.00 h a 20.00 h pola tarde

Como broche final, ás 19.00 horas terá lugar a chocolatada, acompañada de churros e doces. E entre os clientes  haberá un sorteo de produtos.