A Secretaría Xeral de Política Lingüística fixo público o nome do centro gañador do concurso de cartaces das Letras Galegas 2022 e que na categoría de Infantil e Primaria recaeu no CEIP Virxe do Camiño de Rubiá.
A directora do centro, Andrea Tato, explicou que xa se presentaran noutras ocasións pero que no caso de Florencio puideron poñer en valor o traballo feito durante anos para difundir ao autor valdeorrés. «Colaboramos co proxecto das Letras para Florencio dende o inicio así que estabamos moi familiarizados coa potencialidade da súa obra para traballar na escola, hai moita Valdeorras neses debuxos e estamos moi contentos, claro».
Os cartaces son 10 pezas de gran formato debuxados integramente pola rapazada e distribuiranse cunha unidade didáctica elaborada tamén polo centro. Ata que sexan distribuidos pola Xunta non poden amosalos e tiveron que retiralos das súas publicacións en Internet para que permanezan inéditos.
Ademais da satisfacción polo recoñecemento, o premio está dotado con 2.000€ que planean invertir en equipamento tecnolóxico para fomentar a creatividade. Débora Álvarez, directora do proxecto As Letras de Florencio, celebrou tamén que o premio recaera nun centro educativo da comarca destacando que ten unha forte visibilidade xa que os cartaces estarán nas paredes de tódolos centros educativos de Infantil e Primaria de Galicia.
Álvarez lamentou que o concurso de secundaria quedase deserto se ben destaca que «os centros educativos son unha peza fundamental da celebración da Letras Galegas e da transmisión da nosa lingua e hai que agradecer a súa implicación e incentivala con concursos coma este».
