O talento musical do Barco fai historia cunha Mención de Honor na Mostra Musical do Eixo Atlántico

O talento musical do O Barco de Valdeorras volveu destacar máis alá da comarca. O Grupo de Ventos do Conservatorio Profesional e Escola de Música do Barco acadou esta fin de semana unha Mención de Honor na IX Mostra Musical do Eixo Atlántico, converténdose na primeira formación barquense premiada neste certame internacional.

A cita, celebrada en Vilalba, reuniu a 103 intérpretes procedentes de 23 escolas de música e conservatorios de 21 concellos de Galicia e do norte de Portugal, consolidándose como un dos encontros musicais máis importantes da Eurorrexión para novas promesas da música clásica e do jazz.

O cuarteto barquense, único representante da provincia de Ourense nesta edición, estivo formado por Carmen Ruiz Domínguez ao saxofón alto, Iria Bárbara Rodríguez Ferrero ao saxofón tenor, Martín Porto Oliveira ao clarinete e Aarón González Prieto ao saxofón barítono.

Na primeira fase do certame interpretaron a obra «Suite Hellénique», de Pedro Iturralde, unha actuación que lles permitiu acceder á final. Xa na derradeira fase sorprenderon ao xurado coa interpretación de «La pequeña sarda», tamén do mesmo compositor, unha peza de gran complexidade técnica e musical.

O director da Escola de Música do Barco, Manuel Prada, destacou a importancia deste recoñecemento, especialmente polo nivel da competición. «A actuación preparámola durante moito tempo e competimos con cidades moi grandes musicalmente falando», sinalou.

Prada explicou ademais que os membros do tribunal felicitaron expresamente ao grupo barquense polo nivel demostrado durante a súa actuación. «Gostoulles moito a nosa interpretación», afirmou con orgullo.

O acto de clausura e entrega de premios celebrouse no Auditorio Municipal de Vilalba e puxo o broche final a unha edición histórica do certame, marcada tamén pola homenaxe ao músico portugués António Saiote, considerado unha das figuras máis relevantes da música contemporánea portuguesa pola súa traxectoria como clarinetista, director e docente.

O premio na categoría de Agrupacións de Cámara foi para o Quinteto de Ventos de Vila Nova de Famalicão, mentres que o xurado decidiu conceder a Mención de Honor ao Grupo de Ventos do Barco de Valdeorras polo alto nivel artístico demostrado.

Este recoñecemento supón un novo impulso para o Conservatorio e Escola de Música do Barco, que continúa consolidando o seu traballo formativo e situando o nome de Valdeorras entre os referentes musicais da Eurorrexión.