O IES Lauro Olmo do Barco quere compartir co resto da vila o que se vive cada día dentro das súas aulas. Esta semana, faino por partida dobre: cunha feira que convida a descubrir a Formación Profesional e cun roteiro literario que transforma O Barco nun gran xogo de pistas cheo de letras.
A primeira cita será o xoves 29 de maio, entre as 11.00 e as 13.00 horas, na Praza do Concello, onde se celebrará a II Feira da FP. Alí, profesorado e alumnado daranse cita para explicar, mostrar e mesmo demostrar en directo algunhas das habilidades que se aprenden nos ciclos formativos do centro. Quen se achegue poderá ver ferramentas, materiais e experimentos en vivo. A idea é clara: abrir as portas da formación ao público e amosar que a FP é unha opción de futuro, práctica e con moito potencial.
Ao día seguinte, o venres 30 de maio, chega unha das actividades máis queridas do centro: o roteiro literario “Atención! Xente Lendo!”, que cumpre xa dez edicións. Este ano, o alumnado da ESO percorrerá diferentes puntos do concello superando probas literarias, mentres o de 1.º de Bacharelato asumirá o papel de guía e xuíz. Pero non estarán sós: nesta xincana tamén participa a xente da rúa, que poderá ser retada polos estudantes e, de paso, levar un pequeno agasallo conmemorativo.
A xornada rematará cunha festa na Praia Fluvial, na zona do Silfest, con lecturas para celebrar as Letras Galegas e actuacións musicais protagonizadas polo propio alumnado e profesorado. Un final festivo para unha semana onde o saber, a creatividade e a comunidade van da man.
