Uns 90 atletas participaron este domingo no Barco na XVI Carreira Popular dos Santiños. Ricardo Vázquez, do club ADAS, foi o máis rápido na proba absoluta da cita, que era puntuable para a XLI Copa Deputación Ourense - 5 K en ruta. Completaron o podio Pablo Alonso e Manuel Estévez, dos clubs Boutueira e ADAS, respectivamente.
Nas categorías inferiores, Saúl Crespo, Emma Fernández e Itziar Gerlobés subiron ao podio na idade sub-16. Yago Carballide, Sara Fernández e Cloe Yáñez fixeron o propio en sub-14. En sub-12 masculino, ocuparon os tres primeiros postos David García, Matías Méndez e Daniel Álvarez. Pola súa banda, en sub-12 feminino foron Paula Crespo, Irina Sánchez e Alejandra Prieto as que subiron aos tres caixóns do podio.
Finalmente, nas clasificacións de menores de 10 anos, Valentina Barreda, Adriana Rodríguez e Antía Rodríguez foron as tres primeiras en categoría feminina. Na masculina, os máis rápidos en cruzar a liña de meta foron Izan González, Lucas Paradelo e Adrián Pérez. Agás un, todos os participantes nas probas de categorías inferiores pertencen ao ADAS.
A XVI Carreira Popular dos Santiños estaba organizada pola Delegación en Valdeorras da Federación Galega de Atletismo e o ADAS O Barco, co patrocinio da Deputación de Ourense e Concello de O Barco de Valdeorras. Era puntuable para a XLI Copa Deputación Ourense – 5 K en ruta. Podían participar atletas populares e atletas federados.
A proba tivo carácter solidario a beneficio de Cruz Vermella en Valdeorras e recolléronse xoguetes novos nun stand instalado no Estadio Municipal de Calabagueiros onde os atletas e calquera persoa, podían doar os seus xoguetes novos, educativos e non bélicos nin sexistas.
