En 1934, Alfonso Daniel Rodríguez Castelao foi desterrado a Badaxoz nun traslado laboral forzoso. Na súa viaxe cruzou Valdeorras en tren acompañado de Florencio Delgado Gurriarán. Noventa anos despois, a Fundación que leva o nome do poeta valdeorrés organiza un programa especial para lembrar aquel episodio e achegar ao público a figura de Castelao.
A primeira cita será o sábado 4 de outubro, cunha actividade titulada «Castelao e Florencio, unha conversa no tren do desterro». A xornada comezará ás 9.00 horas coa saída en autobús desde a praza do Concello do Barco cara a Monforte. Alí, ás 10.00 horas, embarcarase no tren con destino a O Barco, onde os historiadores Ricardo Gurriarán e Uxío-Breogán Diéguez conducirán unha conversa sobre Castelao e Valdeorras.
O programa continuará ás 11.15 coa chegada do tren a O Barco e ás 11.30 a charla seguirá no Multiusos. A despedida será ás 12.30 horas cun viño e petiscos, convertendo a mañá nun encontro cultural e participativo. A inscrición para participar nesta actividade pode realizarse a través do formulario dispoñible en a web.
Xa o domingo 5 de outubro, ás 12.30 horas, a protagonista será a faceta artística do autor de Sempre en Galiza. Pilar García Negro ofrecerá a conferencia «Castelao artista» na Sala Abanca do Barco, con entrada libre ata completar aforo.
Este fin de semana supón unha oportunidade única para coñecer mellor a Castelao desde diferentes perspectivas e para lembrar tamén o vínculo de Valdeorras coa súa biografía.
