«O obxectivo das Deputacións é atender ós Concellos de menos de 20.000 habitantes e facelo cuns criterios equitativos, pero na de Ourense o gasto é discrecional e castiga ós municipios nos que non goberna o PP» Así de taxante se amosou hoxe Alfredo García, alcalde do Barco e presidente da FEGAMP, nun acto de protesta ante a Deputación de Ourense e na que PSOE, BNG e Democracia Ourensana se uniron para reclamar un reparto equilibrado dos fondos provinciais. Nos orzamentos do 2018, que foron presentados recentemente en Comisión, a partida destinada a Obras e Servizos redúcese de 55.000 a 48.000 € por municipio, o que supón unha baixada de 500.000 € en toda a provincia.
O rexidor barquense explicou que establecer unha cantidade fixa por municipio non responde ás necesidades do territorio e deixa a maior parte da inversión en mans do ente provincial. Tamén opina que esa baixada é «un acto de chulería» despois do anuncio da Deputación de que subiría esa partida a 60.000 €. «Os municipios pequenos van notar esa baixada de 7.000 € máis que O Barco pero, en realidade, o importante é que a Deputación non quere cambiar a maneira na que distribúe os recursos e invirte máis na capital e en cousas que non teñen que ver coa súa función», explicou García, presidente tamén da FEGAMP.
Outra das críticas que lanzaron os rexidores é que se endurecen os criterios para que sexa o municipio o que adxudique a obra. Ata o e agora se o Concello aportaba o 50% do orzamento podía facer o concurso, pero no 2018 terá que igualar o gasto da Deputación para poder facer a adxudicación. Ó seu entender, isto vai perxudicar ás empresas locais e favorecer ós contratistas habituais do goberno provincial.
«Desprezo absoluto por Valdeorras»
O alcalde de Allariz, Francisco García, tamén presente na protesta, destacou que no resto das Deputacións provinciais galegas xa se aplica un criterio diferente para redistribuir as inversións: «Na Deputación de Lugo comezouse a facer agora co apoio dos Concellos do PP, o cal é unha contradicción respecto ó que o seu partido fai aquí en Ourense». O alcalde do Barco destacou que seguindo eses criterios aprobados en Lugo, e que xa aplican en Pontevedra e na Coruña, O Barco recibiría 500.000 € para invertir en Obras e Servizos, aínda que poderían ser máis. «O Barco representa o 4% da poboación de Ourense así que nunha distribución proporcional do gasto tería que recibir 3,2 millóns dos 80 millóns de euros do orzamento provincial», puntualizou García, destacando a discriminación histórica da comarca: «Que sentimento teñen que ter os veciños da comarca de Valdeorras? Pois o que tiveron durante moitos anos, de desprezo absoluto por parte da institución provincial e de desprezo pola centralización dos servizos en Ourense capital».
O Barco de Valdeorras27.4 °Calgo de nubes
