)
A localidade de Seadur, no concello de Larouco, converteuse unha vez máis nun escenario para a palabra e a reflexión coa celebración do XVIII Encontro de Poetas nas Videiras, unha cita cultural que une literatura, música e paisaxe nun ambiente único.
O encontro, organizado pola poeta Rosa García coa colaboración do Concello de Larouco, tivo lugar na antiga casa da escola da parroquia, un espazo rehabilitado que simboliza o paso do tempo e a transformación das comunidades rurais. A través da iniciativa coñecida como Seadur Climática, este edificio converteuse nun lugar para a cultura, a reflexión e o encontro veciñal.
O recital estivo conducido por Jorge Moral, quen abriu o acto destacando a sorte de poder celebrar o encontro neste espazo cheo de historia. Durante a súa presentación explicou que antigamente naquela escola se aprendía a sumar, dividir ou multiplicar, mentres que hoxe se converte nun lugar onde compartir música, poesía e fotografía. “Todo vai sendo e deixando de ser co paso do tempo. Hai moitas cousas que mudan”, sinalou, enlazando co tema desta edición: “Cambia o clima, mudan os tempos”.
A tarde, marcada por unha fina chuvia no exterior e un ambiente cálido no interior, convidaba a gozar da poesía mentres desde fóra se podía contemplar a paisaxe de viñedos que rodea Seadur. O encontro comezou coa actuación musical de Nerea Jiménez, que interpretou unha canción en galego cunha voz cálida que deu paso ao recital poético.
A continuación foron sucedéndose as intervencións dos distintos participantes: Carmeliña García, Concha Rodríguez, Ana Rosa, Anxo Muiños, Mercedes Martos, Laura Falgueiras, Jorge Moral, os alumnos do Instituto Cosme López, Saray Rodríguez, a organizadora Rosa García, Diana Ramos e Alfonso Campos.
Cada un deles compartiu os seus versos cun público atento, abordando cuestións relacionadas coa natureza, o paso do tempo e os cambios climáticos. Moitos dos poemas fixeron tamén referencia aos devastadores incendios forestais que afectaron á comarca durante o pasado verán, lembrando a importancia de coidar o territorio e a paisaxe.
A ambientación da antiga escola tamén estivo coidada ao detalle. Diferentes recunchos do espazo representaban as catro estacións do ano, unha decoración simbólica que reforzaba a temática do encontro. Tal e como comentou Rosa García, “hoxe por hoxe son catro, pero non sabemos se ao longo dos séculos seguirán sendo así”, nunha clara referencia aos cambios que está a experimentar o clima.
Co acompañamento visual das fotografías de Loisrúa, o Encontro de Poetas nas Videiras volveu demostrar que a cultura pode medrar tamén no corazón do rural, convertendo Seadur nun espazo onde a palabra poética dialoga coa paisaxe, coa memoria e co futuro.
