O Concello de Larouco vén de ser distinguido coa Bandeira Verde de Galicia 2025, un recoñecemento que premia o compromiso dos municipios coa sustentabilidade, o coidado do medio ambiente e a protección do patrimonio natural. A localidade forma parte dos 33 proxectos galegos que acadaron este galardón, promovido para destacar as boas prácticas en materia ambiental.
Desde o consistorio destacan que este trofeo é «un testemuño visible e público de que Larouco está firmemente comprometido cun modelo municipal que coida o seu medio ambiente e pensa nas xeracións futuras». Nesa liña, o municipio desenvolve proxectos innovadores que combinan o turismo rural responsable coa mobilidade sostible e o dinamismo local, apostando por un crecemento equilibrado e respectuoso co entorno.
O Concello agradeceu a todas as persoas que contribúen día a día a facer posible este modelo de desenvolvemento sostible. «Este logro é o resultado dun compromiso colectivo de todas as persoas que colaboran para facer do noso concello un exemplo de respecto e coidado polo entorno», sinalan desde o goberno local.
Con esta distinción, Larouco consolídase como un referente en sustentabilidade e protección ambiental dentro da provincia de Ourense, reforzando o seu papel como territorio que aposta pola calidade de vida, o respecto pola natureza e o turismo responsable.
