A campaña micolóxica deste ano está sendo variable segundo as especies que se queiran recoller, segundo explica Juanjo Martínez, membro da Asociación Los Cogordos. No caso das setas do orde boletales, a tempada está a ser excelente grazas ás intensas choivas e ás temperaturas suaves, que favoreceron a súa emerxencia de forma espectacular.
Con todo, outras especies que precisan temperaturas máis baixas, como os Cantharellus ou o Tricholoma equestre, aínda non fixeron acto de presenza, cando normalmente a estas alturas do ano xa terían aparecido. Martínez sinala que se agarda que estas especies emerxan a medida que as temperaturas vaian descendendo.
A situación tamén varía segundo a zona xeográfica, xa que non é o mesmo falar da costa que das montañas de Trives, onde as condicións climáticas poden influír de xeito diferente no crecemento das setas.
Recentemente, Martínez atopou no monte un brote importante de Amanita phalloides, unha especie moi perigosa para o consumo. «Calquera afeccionado debe coñecela pola súa toxicidade», advirte, subliñando que as observacións se realizaron en diferentes localizacións.
Diante do crecente interese pola recolección de setas, o experto destaca a importancia de estar ben informados. Recomenda acudir a expertos e a asociacións micolóxicas para aprender a identificar as diferentes especies.
De feito, a Asociación Los Cogordos está a impartir un curso de iniciación para as persoas que desexan iniciarse na micoloxía, un campo que, segundo Martínez, é «inabarcable, con milleiros de especies e as súas características propias». A partir deste coñecemento, aconsella estudar e consultar libros para recoñecer as setas, sempre que sexa posible baixo a orientación dun especialista.
Martínez tamén insiste en que, aínda que o consumo sexa o principal atractivo da micoloxía, esta disciplina vai máis aló de recoller cogomelos para comer. Á hora de realizar a recolección, é fundamental seguir as normativas vixentes, recollidas no decreto de aproveitamento micolóxico da Xunta de Galicia. Por exemplo, está prohibido o uso de bolsas de plástico, xa que as setas se estragaríanse máis e non se favorecería a dispersión das esporas no campo.
Sobre o debate entre cortar ou arrincar as setas, o experto lembra que, aínda que antes se recomendaba cortar, o decreto actual especifica que a forma correcta de recolección é arrincando a seta na súa totalidade. «É importante seguir as recomendacións para protexer o medio e garantir a sustentabilidade desta práctica», conclúe.
Si desexa escoitar a entrevista completa pode facelo aquí:
