Viva o magosto!

Os bombos deron volta e soaron en Valdeorras, máis no seu interior non había bolas da sorte se non castañas que a medida que se ían asando estoupaban de vez en cando.

Córgomo, Arcos e Fontei  na comarca de Valdeorras e tamén na Pobra de Trives, seguro que se asaron castañas nalgún lugar da contorna pero estes foi aos que fomos.

Córgomo, entre cantos de taberna

O de Córgomo era o que máis cedo comezaba. As sete era a hora prevista pero «Os Parrandas» xa lle estaban dando «lume» aos bombos, gaitas, pandeiretas e tamborres e por suposto cantando esas cancións que recordan, aos que somos máis vellos os cantos nas adegas, sore todo cando chegaba este tempo.

Estivo organizado polas Mulleres Rurais de Córgomo coa colaboración do Concello e dúas adegas do lugar: Viñaredo e Santa Marta.

O menú, bolos preñados —bolo que se coce cun chourizo dentro—, viño, bica e bullotes.

Arcos, bullotes en carretillo

Arcos reuniu na zona do centro social a máis de 200 persoas que puideron degustar bolos preñados, viño, castañas asadas doces e licores.

A organización correu a cargo da asociación de veciños de arcos, as mulleres rurais e os coveiros coa colaboración do Concello de Vilamartín.

Non faltou á cita Carlos, que non parou de mover o bombo das castañas e, aínda cas primeiras quedaron un pouco crúas o saír o segundo bombo volvéronse a asar e todo listo.

O que máis chamou a nosa atención foi que os bullotes puxéronse nun carretillo e de alí íanas collendo os asistentes.

A música púxoa un DJ de Arcos que fixo soar baladas e tamén pezas máis «cañeras».

Fontei, 38 anos de magosto

Fontei celebrou por trixésimo oitava vez o magosto tradicional organizado pola Asociación de veciños de Fontei. Unha xuntanza popular que como significaba Enrique Rodríguez Sotelo, membro da asociación e un dos promotores desta «Xuntanza Popular». «Eu creo que leva máis de 38 anos, xa que eu recordo de mozo, antes de ir á mili facelo», subliña.

En Fontei o magosto faise coma sempre ao remate da cea —cada un na súa casa—saen á praza como se fixo sempre e, cómense as castañas asadas. Viño e castañas e se cadra como nos últimos tempos, bica. Alí bótanse unhas parolas, unhas risas e xa.

Con puntualidade xermánica préndese o lume a hora indicada —este ano ás nove da noite, un pouco antes que nos anteriores— eso sí Enrique teno todo preparado desde a media tarde. Os paus, o viño, as castañas dentro do bombo....

Así valoraba Enrique a noite de magosto: «Resultou unha noite mui participativa onde desfrutamos dun acto cheo de boa veciñanza apretados xunto a fogueira que nos daba calor. As castañas saíron mui ben asadas resaltando o seu sabor. As bicas regaladas por Artesanos Peyma endulzaron aínda mais esta noite que nos meteu na mais fonda historia das nosas raíces».

Trives desfrutou dos bullotes coa música de Assia

Longas ringleiras para facerse cos bullotes na Pobra de Trives e, é que foi unha festa en toda regla coa música do grupo Assia incluído.