Galicia reforza a loita contra os incendios cun novo avión de coordinación con base en Verín-Oímbra
O dispositivo galego de prevención e defensa contra os incendios forestais conta desde este mes de agosto cun novo avión de coordinación e vixilancia, unha aeronave que amplía a capacidade da Xunta para seguir desde o aire a evolución dos lumes e facilitar a toma de decisións dos equipos que traballan sobre o terreo.
O novo medio, denominado «Xunta 23 ACO», opera desde o pasado 1 de agosto na base aérea transfronteiriza de Verín-Oímbra, onde o director xeral de Defensa do Monte.
A aeronave incorpórase aos dous helicópteros de coordinación cos que xa contaba o Servizo de Prevención e Defensa contra os Incendios Forestais da Xunta.
Os ollos do operativo desde o aire
A función deste tipo de aeronaves é diferente á dos medios que atacan directamente as lapas. O seu cometido pasa fundamentalmente por observar, analizar e coordinar.
Desde o aire poden proporcionar información en tempo real sobre a evolución dun incendio, supervisar o dispositivo despregado e acceder visualmente a zonas que poden quedar ocultas desde terra pola propia orografía ou pola presenza de fume.
Esta información resulta especialmente importante á hora de tomar decisións tácticas e estratéxicas, organizar os recursos dispoñibles e manter as comunicacións durante unha intervención.
A bordo traballarán además dous técnicos encargados de analizar e avaliar continuamente a evolución do incendio, dando apoio ao persoal que actúa en terra.
Ata catro horas de autonomía
Unha das principais características do novo «Xunta 23 ACO» é a súa maior autonomía. O avión pode permanecer ata catro horas no aire, ampliando tanto a franxa de traballo como a superficie que pode cubrir durante as operacións.
Trátase ademais dunha aeronave de alta velocidade e con maior capacidade que os helicópteros de coordinación dos que dispón actualmente o operativo autonómico.
Esa capacidade permite que non se limite exclusivamente á observación dos incendios. O avión poderá utilizarse tamén para realizar transportes loxísticos e de persoal, facilitando os desprazamentos cando as necesidades dun operativo así o requiran.
Catro novos medios aéreos este ano
A incorporación deste avión forma parte do reforzo dos medios aéreos previsto este ano pola Consellería do Medio Rural. En total son catro novas aeronaves as que se incorporan ao dispositivo galego contra os incendios forestais. Ademais do avión de coordinación e vixilancia con base en Verín-Oímbra, xa están operativos dous novos avións de carga en terra.
O cuarto medio será un helicóptero pesado, cuxa incorporación está prevista para o próximo mes de setembro.
Co novo «Xunta 23 ACO», Galicia busca reforzar non só a súa capacidade de resposta ante os incendios, senón tamén un aspecto determinante cando se producen grandes emerxencias forestais: dispoñer desde o aire dunha visión global e continuada do lume para coordinar con maior precisión os medios que traballan sobre o terreo.