Casaio, en Carballeda de Valdeorras, converterase este sábado 28 de febreiro nun punto de encontro entre natureza, memoria e creación artística. O Albergue Eco dos Teixos acollerá ás 19.00 horas a presentación de “Un chelo, catro historias”, un proxecto impulsado polo luthier coruñés Adrián Pereiro que transforma a madeira dos bosques galegos nun instrumento cargado de identidade.
A iniciativa vai máis alá da construción dun violonchelo. Trátase dunha proposta que reivindica a riqueza natural e humana de Galicia a través dun instrumento único, elaborado con madeiras locais seleccionadas non só pola súa calidade acústica, senón tamén pola súa carga simbólica.
Un instrumento con memoria
Este violonchelo nace das árbores e das persoas. Cada peza de madeira empregada na súa construción está vinculada a historias de vida de habitantes das catro provincias galegas, persoas que decidiron permanecer na súa terra e desenvolver nela os seus proxectos vitais e profesionais.
Entre os protagonistas destas historias atópanse o artista e escultor Iván Matos, Elba e Pedro —impulsores do propio proxecto Eco dos Teixos— e Javi de Lardacima. As súas traxectorias forman parte da memoria viva que se integra no instrumento, converténdoo nun símbolo de arraigo, sostibilidade e compromiso co territorio.
Cine, música e diálogo
A presentación en Casaio terá un carácter multidisciplinar. A xornada comezará coa proxección do documental “O Chelo Galego”, dirixido por Arián Quinteiro, que recolle o proceso artesanal de construción do instrumento e reflexiona sobre a importancia de empregar madeiras locais como expresión de identidade cultural.
Tras a proxección, o público poderá escoitar o son do violonchelo nun concerto a cargo do músico Saúl Nogareda, quen interpretará unha obra en catro movementos composta especificamente para esta ocasión por Esteban Zapata.
O encontro completará cun espazo de diálogo no que se darán a coñecer as historias humanas que se agochan detrás deste proxecto, reforzando a idea de que a música tamén pode ser un vehículo para contar e preservar a memoria colectiva.
Datos do evento
- Lugar: Albergue Eco dos Teixos, Casaio (Carballeda de Valdeorras)
- Data: Sábado, 28 de febreiro
- Hora: 19:00 horas
- Entrada: Libre e de balde ata completar aforo
Autoría das fotografías: Ricardo Lede
