A área recreativa do Aguillón acolleu as trixésimo oitava edición das Xornadas de Folclore que trouxeron á Rúa a música, o baile e as tradicións, co folclore de países tan alonxados entre si como Bolivia, Tahití ou Ucraína.
Ao comezo gardouse un minuto de silencio polo director do grupo Amezabra de Sudáfrica que faleceu o 7 de agosto tras a actuación na cerimonia inaugural das XXXVIII Xornadas de Folclore no Teatro Principal de Ourense.
O público da Rúa entregouse un ano máis ao folclore internacional e ovacionou con entusiasmo estes grupos que amosaron as súas raíces nesta primeira cita das Xornadas coa provincia ourensá, a través do traballo de Bafopaz (Bolivia), Hei Shou Tahití “Ori” e Poltava (Ucraína).
Este último grupo, Poltava, resultou especialmente aplaudido por haber entre o público refuxiados do pais balcánico que non quixeron perder esta conexión a través da música coa súa terra.
As Xornadas de Folclore de Ourense están organizadas pola Deputación de Ourense e o Centro de Cultura Popular Xaquín Lorenzo e amosarán ata o próximo 16 de agosto as danzas e música tradicionais dos seus territorios en 16 vilas ourensás en horarios de 20.30, 22.30 e 23.00 horas.
Bafopaz, danzas andinas no corazón de Valdeorras
O Ballet Folclórico da Paz, Bafopaz, foi creado no ano 2006 e conta no seu haber con destacados premios como o «Eduardo Abaroa», concedido polo Ministerio de Cultura de Bolivia, ou a «Medalla ao Mérito Cultural», da Asemblea Lexislativa Plurinacional.
Entre as danzas que amosaron atópase a de «Los Suri Sikuris», que ten a súa orixe nas comunidades andinas dos Mollos, Aymaras e Lipis, no departamento de La Paz e interpretábase nas provincias Camacho, Ingavi y Pacajes por mor dun matrimonio ou a construcción dunha casa.
Un dos obxectivos da agrupación boliviana foi amosar un amplo percorrido polas tradicións e culturas das distintas zonas do país, como sucede coa “«Morenada», unha das danzas representativas da cultura occidental de Bolivia e que suscita sempre un debate entre os que defenden a orixe netamente aymara da danza e os estudiosos que atopan probas coloniais e republicanas da notable influencia da cultura dos escravos africanos das minas de ouro e Potosí.
O Barco ten esta tarde unha cita ca multiculturalidade
O Parque do Malecón de O Barco será hoxe o escenario do segundo día das Xornadas, que retoman a súa normalidade despois do falecemento do director da agrupación sudafricana, George Oflilant, a quen se lle adicará un minuto de silencio.O espectáculo comezará as 20.30 horas, deste mércores 9 de agosto, e as agrupacións participantes serán as de Ecuador, Sudáfrica e Arxentina.
