O Concello da Rúa anunciou este sábado a suspensión da concentración que estaba convocada para mañá domingo ás 12:00 horas, diante das «importantes novidades referidas ás labores de extinción do incendio no vertedoiro».
A través dun comunicado difundido nas súas redes sociais e remitido aos medios de comunicación, o goberno local explicou: «Como seguro xa sabedes hoxe anunciamos importantes novidades referidas ás labores de extinción do incendio no vertedoiro de RNPs. Por este motivo o Concello decidiu suspender a concentración prevista para mañá domingo ás 12:00 h. Pensamos que este non é momento para confrontar, senón de avanzar no importante traballo de reconstrución que temos por diante».
O texto engade que, despois de dúas semanas de «moito sufrimento», foi «o labor conxunto de todas e todos» o que permitiu conseguir «esta importante vitoria colectiva». «A posición firme de Concello e cidadanía logrou o que fai só unha semana semellaba imposible. Agora toca avanzar», conclúe a mensaxe.
A Deputación asume a extinción
A decisión municipal chega no mesmo día en que o presidente da Deputación de Ourense, Luis Menor, confirmou que será o organismo provincial quen asuma os traballos de extinción do lume que desde hai quince días permanece activo no vertedoiro municipal da Rúa.
Menor anunciou a activación dun contrato de emerxencia cun investimento estimado de 100.000 euros, que se desenvolverá a través de Tragsa, empresa pública especializada. A maquinaria necesaria chegará esta fin de semana e os labores comezarán o luns.
O presidente provincial fixo o anuncio no propio vertedoiro, acompañado pola alcaldesa da Rúa, María González Albert, a rexedora de Petín, Raquel Bautista, e varios concelleiros. Explicou que o foco, orixinado tras o incendio forestal de Larouco, precisa unha intervención «urxente e complexa» pola magnitude da instalación e a presenza de gases tóxicos con impacto directo na saúde das persoas.
«O Concello non tiña nin medios técnicos nin capacidade financeira para afrontar este problema. Por iso decidimos encargallo a unha empresa con plena garantía técnica e de seguridade», sinalou Menor.
O presidente lembrou tamén que a Unidade Militar de Emerxencias desaconsellara no seu momento intentar apagar o incendio con medios propios, polo que técnicos da Deputación, do Concello e da Xunta analizaron durante días a mellor solución. «Eu tamén fun alcalde dun concello pequeno e sei o que supón unha obra desta envergadura», indicou, subliñando que a Deputación actúa «independentemente das nosas competencias» para dar resposta a unha emerxencia.
