Hai paixóns que unen. O fútbol é unha delas, pero se a isto lle sumamos o amor pola terra e polo bo viño, o resultado é algo tan auténtico como o Atlético Godello. Este equipo, formado por rapaces de Valdeorras afincados na Coruña, non só leva o fútbol no corazón, senón tamén o nome da súa comarca ben presente. Porque, como din eles, «se hai que celebrar, mellor cun bo Godello na man!».
A historia deste equipo comezou cunha simple idea: crear unha alternativa de lecer para aqueles valdeorreses que, por estudos ou traballo, fixeron da Coruña o seu fogar. «Ao principio eramos tres amigos, pero pouco a pouco foise sumando máis xente. Agora mesmo, ademais dos xogadores, temos unha gran afección que nos segue cada semana», conta Anxo García, un dos xogadores do club.
Hoxe en día, o Atlético Godello está federado e compite na segunda autonómica da Coruña. Malia os retos deportivos, nunca perden de vista o seu obxectivo principal: dar a coñecer Valdeorras e o seu viño estrela, o Godello. «Queremos que a comarca teña a visibilidade que merece, que se coñeza todo o que pode ofrecer. E que mellor maneira que a través do deporte?», explica Anxo con entusiasmo.
A presidenta é unha muller tamén de Valdeorras, Macarena Quiroga, quen presume de equipo e está orgullosa de representalos alí onde vaian.
Visita a unha adega moi especial
O amor polo viño non é só simbólico. Os rapaces do Atlético Godello tiveron a oportunidade de visitar a adega Alán de Val, onde Joaquín Sánchez, o xerente, os recibiu con agarimo:
«Para nós é un privilexio que un equipo leve no seu nome algo tan noso como o Godello. Ademais, é bonito ver como levades Valdeorras con vós, aínda que esteades na Coruña», comentaba Joaquín mentres guiaba ao equipo polas instalacións da adega.
E, como non podía ser doutro xeito, a visita rematou cun bo brinde. «Aquí sempre teredes un sitio para celebrar as vitorias... e para afogar as penas se fai falta!», dixo Joaquín cun sorriso.
Un equipo con raíces, pero sen fronteiras
O Atlético Godello non é só un club de fútbol. É un equipo de xente que ama a súa terra. A súa familia medra cada día e xa conta con xogadores de diferentes lugares, incluso de fóra de Galicia. «Este ano temos a Alfonso, que vén de Extremadura. Non sei se será por esa irmandade entre A Rúa e Almendralejo, pero aquí é ben recibido!», din entre sorisos.
O obxectivo está claro: seguir medrando, sumando afeccionados e levando o nome de Valdeorras alá onde xoguen. «Se seguimos así, quen sabe, igual acabamos con trofeos do tamaño dos do Barça!», soltan entre risas.
O que está claro é que este equipo non só xoga ao fútbol, xoga a vivir, a compartir e a presumir con orgullo da súa terra. E, por suposto, sempre cun bo Godello na man!
Deixamos aos membros do Atlético Godello desfrutando dun momento máxico: o sol escondéndose por detrás do Pico de Roblido, tinguindo o ceo de laranxas e vermellos, cores que se funden no encoro de San Martiño coma unha acuarela líquida.
Entre risas e copas alzadas, despedímonos deles e tamén de Joaquín, da súa dona e da súa sobriña, que nos acolleron coa hospitalidade propia da xente de ben. Un adeus que sabe a reencontro, porque cando hai fútbol, viño e amizade, sempre hai unha excusa para volver.
