O deputado provincial socialista Aurentino Alonso anunciou esta mañá en Radio Valdeorras – Onda Cero que o seu grupo político levará ao Pleno da Deputación de Ourense, que se celebra este venres, unha moción centrada na grave situación de contaminación que padece o encoro das Conchas, no sur da provincia de Ourense.
Segundo explicou, a proposta pretende reclamar «solucións urxentes fronte á contaminación crónica que está a sufrir o encoro» e garantir «os dereitos fundamentais da veciñanza afectada».
O encoro das Conchas, situado entre os concellos de Bande, Muíños, Lobeira, Lobios e Entrimo, presenta un problema recorrente de presenza de cianobacterias, que tinguen a auga de verde e fan imposible calquera uso lúdico ou deportivo da zona. Alonso explicou que esta situación está vinculada á elevada carga contaminante procedente da comarca da Limia, onde se concentran grandes explotacións gandeiras intensivas, especialmente de porcino e aves.
«A zona da Limia alberga máis de dous millóns de porcos en explotacións industriais que xeran toneladas de xurros que, ao non seren tratados correctamente, acaban nos cursos fluviais e, finalmente, no encoro das Conchas», advertiu o deputado. Engadiu que informes do CSIC alertan da presenza de 97 millóns de bacterias perigosas por cada litro de auga no encoro, o que supón un risco real para a saúde.
«Un atentado ambiental e unha violación dos dereitos humanos»
Aurentino Alonso lembrou que os veciños da zona, agrupados en asociacións como ACECU e a Asociación de Veciños do Pobo das Conchas, presentaron unha denuncia ante o Tribunal Superior de Xustiza de Galicia por considerar que se están vulnerando dereitos fundamentais como o acceso á auga en condicións saudables. «Hai un dereito á vida que está sendo conculcado», asegurou.
A moción que o grupo socialista defenderá no pleno recolle varias propostas concretas. Entre elas, solicítase a solidariedade institucional da Deputación cos veciños afectados e coas entidades denunciantes, así como o apoio técnico aos concellos implicados.
Medidas propostas
Entre as medidas reclamadas á Xunta de Galicia, destaca a declaración da comarca da Limia como zona vulnerable por nitratos, a suspensión cautelar das autorizacións de novas explotacións gandeiras intensivas e a construción dunha planta de tratamento de xurros, comprometida no Plan Especial da Limia elaborado en 2020 pola Fundación Juana de Vega.
Así mesmo, instan ao Ministerio para a Transición Ecolóxica a elaborar e executar un plan de emerxencia para a descontaminación do encoro das Conchas, cun cronograma claro, dotación orzamentaria e medidas de control estrito dos vertidos.
Aurentino Alonso puxo como exemplo a actuación realizada en Cataluña, onde se construíron plantas de tratamento de xurros en zonas con problemas similares, como Lleida ou o norte de Girona. «Non queremos declaracións baleiras, senón actuacións reais e inmediatas», concluíu.
