Está situada na
rúa Progreso da Rúa e nela poderase consultar calquera dúbida ou problema que xurda nas explotacións gandeiras ou
agrícolas.
Esta tarde inaugurouse a nova sede da Asociación Agraria de Galicia —ASAGA—, en Valdeorras. No acto estiveron presentes o presidente da asociación, Francisco Bello; o líder do RUA, José Vicente Solarat e o presidente da Cooperativa Virxe das Viñas, Carlos Aristegui.
Todos os socios
da organización, así coma os agricultores, gandeiros e produtores forestais da comarca,
terán a súa disposición as instalacións e o persoal técnico desta organización.
«Poderase consultar calquera dúbida ou resolver os problemas que se lle
presenten na súa explotación», sinalan desde o ente agrario.
No transcurso do
acto inaugural o presidente da asociación, Francisco Bello, asegurou: «A nosa
nova sede na Rúa converterase nun lugar de referencia para os gandeiros e
agricultores da comarca». «A nosa organización,
unha das máis importantes do sector agropecuario galego, potenciará a súa
presenza na comarca e no oriente ourensan coa apertura dunha nova sede; moito
máis grande, que contará cun completo equipamento técnico, e con persoal especializado
que ofrecerá un amplo catálogo de servizos aos agricultores, gandeiros e
silvicultores da zona», aclarou.
A Asociación
Agraria de Galicia é unha organización profesional que traballa por tódolos
homes e mulleres do rural galego. Dende a súa fundación, este colectivo,
ademais de colaborar coas distintas administracións públicas, adica o seu
esforzo diario a defender os intereses dos seus asociados, así como de todo o
medio rural, para mellorar a calidade de vida dos veciños das aldeas, pobos e
vilas de Galicia.
Francisco Bello informou aos asistente de que: «O persoal técnico da Asociación Agraria de Galicia en Valdeorras, apoiado polo completo equipo de profesionais que ASAGA ten en Galicia —enxeñeiros agrícolas e forestais, xuristas, economistas, etc—, ofrecerá solucións para calquera tipo de problemas que se poidan presentar aos profesionais do sector agropecuario. Axudará á tramitación de todo tipo de axudas e subvencións, e colaborará conxuntamente cos seus socios no desenvolvemento dun gran número de proxectos relacionados co medio rural».
A nova sede da
Asociación Agraria de Galicia en Valdeorras, atópase no número 74 da rúa
Progreso, na Rúa de Valdeorras.