Vilamartín actúa contra a erosión tras os incendios: «Non podemos quedar cos montes desérticos»

O Concello de Vilamartín comezou a aplicar medidas urxentes para frear os efectos que os incendios forestais deste verán deixaron nos montes da zona. A falta de vexetación e a forte pendente das ladeiras aumentan o risco de escorrentías e arrastres de terra que poderían afectar ás aldeas e á conca do río Leira.

Un bando municipal facía público o pasado venres que se abrirá unha pista perimetral con cuneta arredor dos núcleos afectados, co obxectivo de canalizar a auga de choiva e evitar que esta chegue directamente ás vivendas. Esta medida pode afectar a fincas privadas, polo que se ofrece aos propietarios a posibilidade de poñerse en contacto co Concello para identificar as súas parcelas e aclarar posibles incidencias.

Primeiros traballos en San Vicente de Leira

Onte comezaron os labores en San Vicente de Leira, unha das aldeas máis afectadas polo lume, «ahora mesmo é o que máis preocupa, pero non quere dicir que non me preocupen os outros». E, é que o rexedor está moi inquedo polo que pode pasar no Mazo e a Rodeleira se chove e os arrastres van ao Leira.

O alcalde, Enrique Álvarez Barreiro, explicou que se está a actuar en varias frontes: Apertura de pistas de derivación de augas para protexer o perímetro do pobo. «Unha empresa trouxo tres máquinas, una delas anda facendo limpieza con voluntarios para sacar as madeiras e siso e as outras dúas están a facer labores dunha pista pola parte alta coa intención de retirar as augas a un caldeirón fora da liña do pobo», explicaba.

Tamén quere botar palla nos montes queimados, co fin de crear pequenas barreiras naturais que reteñan as cinzas e diminúan o arrastre de materiais cara ao río e colocar estacas e ramas para improvisar parapetos que faciliten a drenaxe e eviten que a erosión elimine a capa fértil do solo.

«Estamos adiantándonos porque nestes días agárdanse chuvias fortes, e se a auga baixa sen control pode causar moito dano», explicou o rexedor, que destacou a implicación dos veciños e de empresas locais que xa traballan na zona.

O risco para a conca do Leira

As aldeas arrasadas polo lume de San Vicente, Cernego e Robledo sitúanse augas arriba do río Leira, que despois atravesa O Mazo e A Rodeleira. A perda de cobertura vexetal nestas ladeiras supón un perigo engadido, xa que a auga pode baixar con gran forza arrastrando terra, cinzas e árbores queimados.

«O que nos preocupa é que a choiva se leve o pouco solo fértil que queda. Se iso ocorre, os montes poden quedar practicamente desérticos e, ademais, provocar problemas importantes augas abaixo», advertiu Álvarez Barreiro.

Necesidade de apoio técnico

Desde o Concello insisten en que, malia as medidas inmediatas, é imprescindible contar con especialistas que asesoren sobre como actuar de maneira eficaz e duradeira.

«O noso traballo é gañar tempo e poñer en marcha solucións rápidas, pero precisamos técnicos que avalíen a situación e nos indiquen os métodos máis axeitados para frear a erosión”, sinalou o alcalde.

Entre as posibles opcións, apuntou á colocación de barreiras naturais, á aplicación controlada de palla mediante helicóptero ou ao deseño de estruturas que reteñan a auga nos puntos críticos das ladeiras.

Colaboración entre administracións

Álvarez Barreiro expresou a súa esperanza de que tanto a Xunta como o Goberno central coordinen esforzos e ofrezan recursos técnicos e humanos. «O importante é que as administracións colaboren e poñan os medios necesarios para que o que xa sufrimos cos incendios non se converta nun problema maior coa chegada das choivas».

Mentres agarda resposta das institucións, o alcalde e os veciños seguen traballando para evitar que a chuvia arrastre o pouco que quedou tras o lume. «Salvamos o pobo do incendio e agora queremos salvar a terra. Se non actuamos, quedaremos sen nada», concluíu.